Падзеі, факты, анонсы
Лукашэнка прапанаваў расійскім кінематаграфістам сумесна зняць фільм пра Лі Харві Освальда
20 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка прапанаваў расійскім кінематаграфістам зняць сумесны фільм пра Лі Харві Освальда, які, як лічыцца, забіў Прэзідэнта ЗША Джона Кенэдзі. Аб гэтым кіраўнік дзяржавы заявіў на сустрэчы з кіраўніком Рэспублікі Мардовія Расійскай Федэрацыі Арцёмам Здунавым, перадае карэспандэнт БЕЛТА.
Гаворачы пра развіццё гуманітарнага супрацоўніцтва з гэтым расійскім рэгіёнам, кіраўнік дзяржавы прапанаваў зрабіць акцэнт на сумеснай рабоце ў сферы кінавытворчасці. "Вы ўмееце гэта рабіць. Мы былі б вельмі зацікаўлены ў абмене вопытам і дапамозе кадравай. Мы вялікую ўвагу цяпер удзяляем кінематаграфіі. Кіно - найважнейшае з мастацтваў, як гаварыў некалі класік", - сказаў беларускі лідар.
Прэзідэнт расказаў аб тым, што ёсць задума зняць шматсерыйны фільм пра Лі Харві Освальда. Як вядома, у 1960-я гады гэты амерыканец прыехаў у Савецкі Саюз і пражыў у Мінску амаль два з паловай гады, працаваў токарам на Мінскім радыёзаводзе імя Леніна. "Былі б у гэтым вельмі зацікаўлены і маглі б прадаставіць свае паслугі, пляцоўку і заняцца пошукам фінансавання гэтага, упэўнены, вельмі цікавага фільма", - падкрэсліў Аляксандр Лукашэнка.
Упэўненасць у тым, што такое кіно будзе цяпер запатрабавана, надае тое, што тэма забойства Джона Кенэдзі і датычнасці да гэтага Лі Харві Освальда ў амерыканскім грамадстве і цяпер захоўвае актуальнасць і выклікае цікавасць. "Гэта тэма ў Злучаных Штатах Амерыкі цяперашнім Прэзідэнтам Дональдам Трампам актыўна ўзнімалася. Калі своечасова здымем гэты фільм, будзе дарэчы, актуальным будзе фільм", - звярнуў увагу Аляксандр Лукашэнка.
Прэзідэнт не выключыў, што прадстаўнікі кінематографа з абодвух бакоў, магчыма, прапануюць для стварэння фільмаў і іншыя тэмы. "У беларуска-расійскім напрамку можна шмат агульных тэм знайсці з гісторыі, вельмі карысных для нас у тым ліку", - упэўнены кіраўнік дзяржавы.
"Словам, мы гатовы і адкрыты для супрацоўніцтва з вельмі добрым народам, які пражывае на вашай цудоўнай зямлі - Мардовіі", - рэзюмаваў Аляксандр Лукашэнка.
версія для друку
зрабіць стартавай
дабавіць у выбранае