Падзеі, факты, анонсы
Лепшыя спектаклі "Белай вежы" вызначыць экспертны савет з тэатразнаўцаў, журналістаў і гледачоў
30 жніўня, Брэст /Святлана Вячорка - БЕЛТА/. Лепшыя спектаклі XXI Міжнароднага тэатральнага фестывалю "Белая вежа", які пройдзе ў Брэсце з 9 па 16 верасня, вызначыць экспертны савет з тэатразнаўцаў, крытыкаў, прадстаўнікоў СМІ і грамадскасці. Аб гэтым паведаміў 30 жніўня на прэс-канферэнцыі дырэктар фестывалю, генеральны дырэктар Брэсцкага акадэмічнага тэатра драмы Аляксандр Козак, перадае карэспандэнт БЕЛТА.
"Такі вопыт у нас ужо ёсць. Мы і раней збіралі крытыкаў, грамадскасць, прэсу і экспертным саветам вызначалі лепшы спектакль, лепшы спектакль малых форм, лепшыя жаночую і мужчынскую ролі. Я лічу, гэта варта пакінуць. Усё ж такі фестываль - гэта перш за ўсё свята тэатральнага мастацтва. Узнагародай для калектыву з'яўляецца сам удзел у прэстыжным форуме і цікавасць гледачоў", - выказаў свой пункт гледжання дырэктар "Белай вежы". Пры гэтым Аляксандр Козак прызнаў, што наяўнасць або адсутнасць інстытута журы на творчым форуме з'яўляецца спрэчным пытаннем.
Свой удзел у фестывалі пацвердзілі ўжо тэатральныя крытыкі з Эстоніі, Польшчы, Літвы, Украіны і Беларусі. Чакаецца таксама прыезд у Брэст тэатразнаўцаў з Расіі.
У праграме цяперашняга форуму шырока прадстаўлена разнастайнасць жанраў: тэатр формы, гульня ў гатычны трылер, драма, непраўдападобная прытча, школьны квест, фантасмагорыя, рок-опера, мюзікл, камедыя. Увазе гледачоў будуць прапанаваны монаспектаклі, вулічныя і харэаграфічныя пастаноўкі. У фестывальнай афішы знайшлося месца як класічным драматычным спектаклям, так і эксперыментальным работам. Нацыянальнае тэатральнае мастацтва прадстаўлена калектывамі з Казахстана, Кыргызстана, Туркменістана, Грузіі, Малдовы, Азербайджана, Украіны.
"Наша задача заключаецца ў тым, каб форум захоўваў сваю асветную функцыю, быў пазнавальным для гледачоў. У гэтым годзе спаўняецца 25 гадоў з моманту стварэння СНД. Фарміруючы праграму, мы не маглі абмінуць увагай гэту дату. Дэвізам фестывалю я назваў бы слоган: "Праз культуру і мастацтва - да ўзаемаразумення і ўзаемадзеяння", - растлумачыў канцэпцыю "Белай вежы" яе ідэйны натхніцель.
Аляксандр Козак адзначыў вялікую цікавасць да фестывалю з боку гледачоў, а таксама аўтарытэт форуму ў тэатральным свеце. Цяпер фестываль зарабляе больш за 70 працэнтаў свайго бюджэту. Астатнюю частку сродкаў выдзяляюць з бюджэту Брэсцкія абласны і гарадскія выканаўчыя камітэты.
XXI Міжнародны тэатральны фестываль "Белая вежа" адкрыецца 9 верасня камедыяй Нацыянальнага акадэмічнага драматычнага тэатра імя М.Горкага "Дванаццатая ноч". Удзельнікамі цяперашняга форуму стануць яшчэ тры творчыя калектывы з Беларусі. Гаспадары фестывалю - Брэсцкі акадэмічны тэатр драмы - прадставіць маладзёжную пастаноўку "Дарагая Алена Сяргееўна" рэжысёра Цімафея Ільеўскага. Усяго за фестывальны тыдзень будзе паказана 26 спектакляў тэатральнымі калектывамі з 17 краін.
версія для друку
зрабіць стартавай
дабавіць у выбранае