Падзеі, факты, анонсы
Кнігі з бібліятэкі свяціцеля Георгія Каніскага прадставілі ў Мінску. Чым яны ўнікальныя, даведаліся ў НББ
6 жніўня, Мінск /Кар. БЕЛТА/. Экзэмпляры старадрукаваных кніг з бібліятэкі свяціцеля Георгія Каніскага прадставілі на выставе ў Нацыянальнай бібліятэцы Беларусі. Экспазіцыя прымеркавана да 230-годдзя з дня памяці і да дня яго праслаўлення ў ліку святых, перадае карэспандэнт БЕЛТА.
Сярод экзэмпляраў з аўтографам свяціцеля старадрукаванае выданне "Писание Святому согласующоеся наставление к истинному сознанию и душеспасительному употреблению страдания и смерти Господа… сложенное Анастасием проповедником Божия слова".
У кнігі адсутнічае тытульны ліст, і, каб устанавіць аўтарства, супрацоўнікі НББ правялі вялікую работу. "Мы выйшлі на перакладчыка Сімана Тадорскага. Ён вучыўся ў свой час ва ўніверсітэце ў Гале. Больш за дзесяць гадоў ён слухаў розныя курсы, атрымліваў адукацыю ў рэлігійнай сферы і змог зрабіць пераклад, які цяпер перад намі", - расказала метадыст навукова-даследчага аддзела кнігазнаўства Нацыянальнай бібліятэкі Беларусі Вераніка Нескаромная.
Выстава, прысвечаная Георгію Каніскаму, пачала работу сёння ў Музеі кнігі Нацыянальнай бібліятэкі Беларусі. Наведвальнікі могуць убачыць кнігі з калекцыі свяціцеля з яго асабістымі запісамі і праўкамі. Прадстаўлены выданні яго прац, а таксама творы іншых аўтараў аб жыццёвым шляху архіепіскапа.
Георгій Каніскі - епіскап Рускай праваслаўнай царквы, архіепіскап Магілёўскі, Мсціслаўскі і Аршанскі, беларускі і ўкраінскі царкоўны і грамадскі дзеяч, філосаф і пісьменнік.
"Епіскап распрацаваў курсы па рыторыцы, філасофіі, быў рэктарам і выкладчыкам духоўных устаноў, арганізаваў Магілёўскую духоўную семінарыю. А яшчэ запомніўся як збіральнік вялікай асабістай бібліятэкі. На беларускіх землях была багатая кніжная культура: кнігі пісаліся і друкаваліся", - дадала загадчыца сектара арганізацыі і навуковай апрацоўкі фондаў навукова-даследчага аддзела кнігазнаўства НББ Таццяна Карнілава.
версія для друку
зрабіць стартавай
дабавіць у выбранае