12 лістапада, Мінск /Кар. БЕЛТА/. Фільмы з праграмы 27-га Мінскага міжнароднага кінафестывалю "Лістапад" пакажуць у сталіцы па 13 лістапада, паведамілі БЕЛТА арганізатары.
У кінакомплексе "Falcon Club Буцік Кіно" можна будзе ўбачыць два фільмы з асноўнага конкурсу ігравога кіно, пяць - з пазаконкурснай праграмы, а таксама адну дакументальную работу. "Фестываль адменены, але кіно жыве. Нягледзячы на тое, што паказ карцін у фестывальным фармаце ў бягучым годзе не адбудзецца, некаторыя фільмы будуць прадстаўлены ў рамках кінапракату ў 2020-2021 гадах для таго, каб гледачы змаглі ацаніць фестывальную праграму", - адзначылі арганізатары.
Так, паказ французскага фільма "Закаханы Ван Гог" адбудзецца 11 лістапада. "Мастак Леа Мадзоці ў промнях сусветнай славы вяртаецца ў Францыю са сваёй жонкай-мільянершай Беатрыс, гаспадыняй моднай нью-ёркскай галерэі. Напярэдадні адкрыцця персанальнай выставы ён сустракае сваю былую каханую Элізу і Ван Гога", - расказалі арганізатары.
12 лістапада гледачы ўбачаць французскае кіно "Палюбоўнікі". Гісторыя расказвае пра шчаслівую пару Лізу і Сімона. У адзін час фатальныя абставіны разбураюць ідылію. Сімон становіцца злачынцам і вымушаны ўцякаць, разарваўшы сувязь з каханай. Праз тры гады яны сустракаюца пры нечаканых абставінах.
У гэты ж дзень адбудзецца паказ французскай стужкі "Вечнае святло". Паводле слоў арганізатараў, героі разважаюць пра чараўніцкую сутнасць акцёрства і дэманаў кіно.
Да прагляду 13 лістапада прапануецца нарвежскі фільм "Мастачка і злодзей" аб чэшскай мастачцы, якая шукае злодзея, які выкраў дзве яе карціны, і нечакана ўступае ў адносіны са злачынцам.
Фестываль "Лістапад" акрэдытаваны Міжнароднай федэрацыяй асацыяцый кінапрадзюсараў (FIAPF) як конкурсны фестываль фільмаў, створаных у краінах СНД, Цэнтральнай і Паўднёва-Усходняй Азіі, краінах Балтыі, Усходняй і Цэнтральнай Еўропы, на Кубе. Арганізатарам выступае Цэнтр візуальных і выканальніцкіх мастацтваў "АРТ Карпарэйшн". Заснавальнікі - Міністэрства культуры і Мінскі гарадскі выканаўчы камітэт.