Падзеі, факты, анонсы
Канцэрт да 250-годдзя з дня нараджэння Бетховена дадуць у Брэсце
27 кастрычніка, Брэст /Кар. БЕЛТА/. Канцэрт у гонар 250-годдзя з дня нараджэння нямецкага кампазітара Людвіга ван Бетховена адбудзецца сёння ў Брэсцкім акадэмічным тэатры драмы, паведамілі карэспандэнту БЕЛТА ў тэатры.
Канцэрт арганізаваны ў рамках юбілейнага тура-фестывалю музыкі Бетховена пры падтрымцы пасольства Германіі ў Мінску. На Вялікай сцэне выступяць сімфанічны аркестр БАТД пад кіраўніцтвам галоўнага дырыжора Аляксандра Сасноўскага, а таксама спецыяльныя госці - лаўрэаты міжнародных конкурсаў Павел Бацян (скрыпка), Юлія Шырынава (фартэпіяна) і Юлія Ражкоўская (віяланчэль). У праграме вечара заяўлены ўверцюра "Эгмант", канцэрт для скрыпкі з аркестрам, а таксама трайны канцэрт для скрыпкі, віяланчэлі і фартэпіяна з аркестрам.
"Бетховен - адна з самых значных і ключавых фігур у класічнай музыцы. Пры гэтым іграем мы яго не так часта: музыка вельмі спецыфічная, у той жа час прыгожая, моцная. Уверцюра "Эгмант" ужо гучала ў нашым выкананні. А вось трайны канцэрт ніколі раней не выконвалі і сыграем упершыню. Гэты твор у прынцыпе выконваецца вельмі рэдка, таму што вывучыць, адрэпеціраваць і сабрацца адначасова тром салістам заўсёды вельмі складана", - адзначыла асістэнт дырыжора аркестра Вольга Клястова.
Паводле яе слоў, са скрыпачом-віртуозам Паўлам Бацянам калектыў ужо выступаў на сцэне філармоніі ў Мінску, таксама музыкант прыязджаў на юбілейны канцэрт аркестра ў Брэст. "Паміж сабой музыканты ўжо рэпеціравалі. З нашым аркестрам першая рэпетыцыя адбылася напярэдадні канцэрта. Мы гэты матэрыял вучым даўно. Разлічваем на прафесіяналізм музыкантаў і Аляксандра Пятровіча Сасноўскага, які нас аб'яднае", - сказала Вольга Клястова.
"У прынцыпе любы выхад на сцэну хвалюючы, таму што мы паказваем не толькі сваё майстэрства, а яшчэ любоў да музыкі, якую выконваем. Вельмі радасна, калі бачыш у зале не толькі прадстаўнікоў старэйшага пакалення, але і моладзь", - дапоўніла яна.
версія для друку
зрабіць стартавай
дабавіць у выбранае