Падзеі, факты, анонсы
Каля 480 удзельнікаў сабраў у фестывальным Віцебску "Задзвінскі кірмаш"
15 ліпеня, Віцебск /Кар. БЕЛТА/. Амаль 480 удзельнікаў прадстаўляюць свае тавары на традыцыйным "Задзвінскім кірмашы", які размясціўся ўздоўж набярэжнай Заходняй Дзвіны каля культурна-гістарычнага комплексу "Залатое кальцо горада Віцебска "Дзвіна", перадае карэспандэнт БЕЛТА.
Па існуючай традыцыі Задзвінне на час "Славянскага базару" прымае кірмаш, дзе разнастайныя тавары, у тым ліку ручной работы, прадстаўляюць майстры з Беларусі і Расіі. У гэтым годзе тут сабраліся каля 480 удзельнікаў, 370 з якіх - рамеснікі. Цацкі, упрыгажэнні, выкананыя ў розных тэхніках, каваныя і вырабы з дрэва, саломкі, аксесуары, прадметы дэкору - кожны можа знайсці сабе штосьці на свой густ. Што датычыцца адзення, то тут яно прадстаўлена ў шырокім асартыменце - дзіцячае, дарослае, дызайнерскае, ёсць эксклюзіўныя вязаныя і вышытыя мадэлі, а таксама кажухі і футры, каб падрыхтавацца да зімы загадзя.
Упершыню ў якасці рамесніка ўдзельнічае ў кірмашы віцябчанка Святлана Елісеева. "Ужо калі выйшла на пенсію, вырашыла, што трэба чымсьці заняцца, каб не сядзець без справы. У лістападзе мінулага года я аформілася як рамеснік і ўжо тады пачала рыхтавацца да "Славянскага базару". Другі дзень я тут, у Задзвінні, але паспела адчуць атмасферу свята. Вельмі многія падыходзяць, пытаюцца, фатаграфуюць, і для мяне гэта важна. Водгук на тое, што я раблю выключна ўручную, дае задавальненне і натхненне на будучыню. Мне патрэбна ведаць, што ў мяне атрымліваецца добра. Напрыклад, адзін мужчына ўзяў дзве лялькі-грэлкі на заварачныя чайнікі - маме і сястры ў падарунак. Сказаў, што ў дзяцінстве такія бачыў, а потым яны нячаста яму трапляліся. Або вязаныя круглыя дыванкі з трыкатажу - вельмі цёплыя водзывы пра іх. Некаторыя гавораць, што толькі ў бабуль у вясковых дамах такія былі, і ў кагосьці яны выклікаюць успаміны аб леце, школьных канікулах і бесклапотным часе", - падзялілася майстрыха.
Гэта штосьці новенькае - так гавораць віцябчане аб вырабах барысаўчанкі і мнагадзетнай мамы Алесі Вайткевіч, якая прывезла сувеніры з "ільняной паперы" і бабуліну друкарскую машынку. "Я каля пяці гадоў займаюся вытворчасцю вырабаў з перапрацаванай паперы. Для стварэння цікавай і прыемнай навобмацак тэкстуры сушу размякчаную масу на льняной тканіне. Дадаю таксама пялёсткі васількоў, атрымліваецца эксклюзіўнае палатно з каляровымі ўкрапінамі. Гатовыя лісты разразаю і раблю з іх паштоўкі, канверты, закладкі для кніг. Друкарскую машынку, якая дасталася мне ад бабулі, прывезла сюды для своеасаблівага інтэрактыву - прапаную на загатоўцы зрабіць надпіс, пажаданне, матывацыйную цытату, выкарыстоўваючы гэты механізм. Атрымліваецца індывідуальны выраб з цікавай тэкстурай і цісненнем. Гэта можна падарыць камусьці або пакінуць сабе для ўпрыгожвання, напрыклад, рабочага стала", - сказала госця фестывалю.
"Задзвінскі кірмаш" будзе працаваць для ўдзельнікаў і гасцей "Славянскага базару" да 20 ліпеня.
версія для друку
зрабіць стартавай
дабавіць у выбранае