Падзеі, факты, анонсы

Каля 160 кірмашоў пройдуць у Беларусі ў час калядных і навагодніх свят

Фота з архiва

9 снежня, Мінск /Кар. БЕЛТА/. У Беларусі на навагодніх і калядных святах запланавана правесці каля 160 кірмашоў. Аб гэтым паведаміў сёння на прэс-канферэнцыі "Навагоднія распрадажы. Пашырэнне асартыменту беларускіх вытворцаў і гандлёвых сетак" начальнік упраўлення арганізацыі гандлю і грамадскага харчавання Міністэрства антыманапольнага рэгулявання і гандлю Міхаіл Жыгала, перадае карэспандэнт БЕЛТА.

"Ва ўсіх рэгіёнах краіны, а таксама ў Мінску актыўна ідзе падрыхтоўка да правядзення кірмашоў. Усяго іх па рэспубліцы запланавана каля 160", - расказаў Міхаіл Жыгала.

Усе мерапрыемствы будуць праводзіцца з улікам рэкамендацый па прафілактыцы каранавіруснай інфекцыі. "У выпадку змянення эпідэмічнай сітуацыі на тэрыторыі асобных адміністрацыйных тэрытарыяльных адзінак магчымы змяненні як па колькасці запланаваных мерапрыемстваў, так і па фармаце іх правядзення", - адзначыў ён.

З 14 снежня пачнуць працаваць ёлачныя кірмашы. Кошт натуральных елак будзе залежаць ад вышыні дрэва: мінімальная цана складзе Br6,2.

Тэматычнае афармленне вітрын аб'ектаў гандлю, грамадскага харчавання, гандлёвых і абедзенных залаў, прылеглых да іх тэрыторый і фасадаў з выкарыстаннем навагодніх інсталяцый, ілюмінацыі ў залежнасці ад рэгіёна завершыцца да 10 снежня.

"У перадсвяточныя і святочныя дні па ўсёй Беларусі будуць прадоўжаны рэжымы работы гандлёвых аб'ектаў, аб'ектаў грамадскага харчавання і сферы паслуг", - дадаў Міхаіл Жыгала.

У аб'ектах грамадскага харчавання распрацаваны святочныя меню з шырокім асартыментам страў і напіткаў айчыннай вытворчасці. "Арыенціровачны кошт пераднавагодніх мерапрыемстваў у залежнасці ад фармату правядзення складзе ад Br27 да Br160 на чалавека, у навагоднюю ноч цэннік аб'ектыўна будзе вышэйшым і можа вар'іравацца ад Br50 да Br200", - растлумачыў Міхаіл Жыгала.

Паводле даных МАРГ, на паліцах магазінаў можна знайсці каля 50 найменняў кандытарскіх навагодніх падарункаў ад 300 г да 3 кг, цэны будуць стартаваць ад Br3,9. У магазінах прадаецца 40 найменняў шампанскага і пеністых він, звыш 100 відаў карнавальных касцюмаў, больш за 3 тыс. разнавіднасцей ёлачных упрыгажэнняў, сувеніраў, а таксама іншых нехарчовых тавараў з навагодняй і каляднай тэматыкай.

версія для друку

зрабіць стартавай

дабавіць у выбранае