Падзеі, факты, анонсы

Калектывы з 10 краін прымуць удзел у тэатральным форуме "М@rt. кантакт" у Магілёве

Фота з архіва

10 студзеня, Магілёў /Сяргей Кулягін - БЕЛТА/. ХIV Міжнародны маладзёжны тэатральны форум "М@rt. кантакт" пройдзе ў Магілёве 21-27 сакавіка. На ім будзе прадстаўлена 23 спектаклі тэатральных калектываў з 10 краін, паведаміў сёння на прэс-канферэнцыі намеснік старшыні аблвыканкама, старшыня аргкамітэта форуму Андрэй Кунцэвіч, перадае карэспандэнт БЕЛТА.

"Гледача чакае насычаная, яркая і разнажанравая праграма. Таму мы разлічваем на вялікую глядацкую цікавасць і плануем ужо з 15 студзеня пачаць рэалізацыю білетаў на спектаклі, - сказаў старшыня аргкамітэта форуму. - Мы таксама спадзяёмся, што гэты фестываль будзе садзейнічаць развіццю міжнародных кантактаў і стане сур'ёзным стымулам для новых ініцыятыў і творчага росту маладых таленавітых рэжысёраў і акцёраў".

На тэатральнае свята запрошаны калектывы, якія ўжо ярка праявілі сябе на форуме папярэднія гады, а таксама новыя тэатры і творчыя групы з Расіі, Літвы, Латвіі, Украіны, Польшчы, Ізраіля і іншых краін. "Спектаклі форуму традыцыйна пра моладзь, для моладзі і з удзелам моладзі. Тэмы - актуальныя і вечныя: узаемаадносіны паміж людзьмі і канфлікт пакаленняў, станаўленне асобы і пошук сябе, масавая культура, інтэрнэт і іншыя. Інакш кажучы, палітра праграмы вельмі яркая і актуальная, у якой чакаецца нямала творчых эксперыментаў. Таму цяперашняе мерапрыемства абяцае стаць адным з самых прыкметных і цікавых культурных падзей бягучага года ў жыцці вобласці".

Як адзначыў дырэктар Магілёўскага абласнога драматычнага тэатра Андрэй Новікаў, своеасаблівым дэвізам тэатральнага форуму стане "класіка і сучаснасць". "Інакш кажучы ў афішы шмат пастановак паводле класічных твораў, у тым ліку паводле Альбера Камю, Вальтэра. Але таксама нямала знакавых сучасных тэкстаў, напрыклад, пастаноўка "Чалавек з Падольска" (Театр.doc, г. Масква, Расія) або незвычайны праект "ЦэШо" - сацыяльны рэйв-бэнд кіеўскага Цэнтра сучаснага мастацтва "ДАХ" і незалежнай групы артыстаў "Тэатр-Пральня" (Украіна).

Магілёўскі абласны драмтэатр прадставіць спектакль "Жоўты пясочак" у пастаноўцы маладога рэжысёра Камілі Хусаінавай паводле апавядання Васіля Быкава, а Магілёўскі абласны тэатр лялек пакажа прэм'еру "Кандыд, або Аптымізм" (паводле Вальтэра) у пастаноўцы галоўнага рэжысёра тэатра Ігара Казакова.

У час спецыяльнай праграмы форуму адбудуцца традыцыйныя майстар-класы для маладых акцёраў, а на працягу фестывальнага тыдня будзе працаваць майстэрня маладой рэжысуры. Тэатральныя крытыкі вызначаць "Падзею форуму", па выніках глядацкага і інтэрнэт-галасавання выберуць лепшы спектакль.

Праект стартаваў у 2006 годзе. За гэты час форум стаў адным з самых значных і чаканых  культурных падзей не толькі ў Магілёве, але і ва ўсёй тэатральнай прасторы Беларусі. Геаграфія форуму шырокая. За ўсе гады правядзення фестывалю на ім было паказана больш за 200 спектакляў з 21 краіны. Іх паглядзелі больш за 40 тыс. гледачоў.

Заснавальнікамі форуму з'яўляюцца Міністэрства культуры, Магілёўскі абласны выканаўчы камітэт, Магілёўскі абласны драматычны тэатр.

версія для друку

зрабіць стартавай

дабавіць у выбранае