Падзеі, факты, анонсы

Яшчэ адно выратаванае жыццё. Урачы РНПЦ дзіцячай хірургіі правялі ўнікальную аперацыю нованароджанай

8 снежня, Мінск /Кар. БЕЛТА/. Упершыню ў Беларусі нованароджанаму малышу з прыроджаным працяглым крытычным стэнозам трахеі была выканана слайд-пластыка з падключэннем ЭКМА, паведамілі БЕЛТА ў прэс-службе Міністэрства аховы здароўя.

Як адзначаецца, гэты парок развіцця несумяшчальны з жыццём. Паводле слоў галоўнага пазаштатнага дзіцячага кардыяхірурга Міністэрства аховы здароўя, дырэктара РНПЦ дзіцячай хірургіі Канстанціна Драздоўскага, дзяўчынка з прыроджаным парокам на 11-я суткі, як толькі гэта стала магчыма, была пераведзена ў РНПЦ.

"Пры выкананні трахеабронхаскапіі ў дзяўчынкі быў дыягнаставаны крытычны працяглы стэноз трахеі на фоне поўных калец трахеі. Спецыялісты выставілі дыягназ: працяглы крытычны стэноз трахеі, поўныя кольцы трахеі, расшчапленне мяккага і цвёрдага паднябенняў, ДМЖП, прыроджаная пнеўманія", - расказаў Канстанцін Драздоўскі.

Улічваючы працягласць стэнозу з крытычным звужэннем прасвету, немагчымасць інтубацыі трахеі і паўнацэннай вентыляцыі лёгкіх, несумяшчальнасць гэтага пароку з жыццём, патрабавалася тэрміновая хірургічная карэкцыя пароку па жыццёвых паказчыках. 17 лістапада на 14-я суткі жыцця пацыента ўрачы-кардыяхірургі Юрый Ліннік і Андрэй Запалянскі выканалі аперацыю, якая доўжылася больш за 6 гадзін.

Паводле інфармацыі медыкаў, пасляаперацыйны перыяд праходзіць гладка. Цяпер пацыент дыхае самастойна, набірае масу цела, рыхтуецца да пераводу на наступны этап выходжвання ў РНПЦ "Маці і дзіця".

Дарэчы, вага дзіцяці на момант аперацыі была ўсяго 1950 г. Паводле даных замежнай літаратуры, маса цела пацыентаў, якім выконвалася такое ўмяшанне, складала не менш за 2500 г.

версія для друку

зрабіць стартавай

дабавіць у выбранае