7 снежня, Мінск /Кар. БЕЛТА/. Гран-пры XII Міжнароднага фестывалю студэнцкіх тэатраў "Тэатральны куфар-2015" БДУ атрымаў спектакль "Вій" тэатральнай майстэрні "Студыёзы" Беларускага дзяржаўнага ўніверсітэта культуры і мастацтваў (БДУКМ). Аб гэтым БЕЛТА паведамілі ў прэс-службе Белдзяржуніверсітэта.
Спектакль "Вій" стаў лепшым у дзвюх намінацыях: "Лепшая сцэнаграфія" і "Лепшая мужчынская роля другога плана", якую атрымаў Мікіта Прымачэнка.
Дыплом за "Лепшую жаночую ролю" атрымала студэнтка майстэрні Мікалая Кірычэнкі Беларускай дзяржаўнай акадэміі мастацтваў Дар'я Парменянкова. У намінацыі "Лепшая мужчынская роля" перамогу атрымаў Дзяніс Грыгарук (тэатр "СинематографЪ", Украіна). Яго калега па тэатры Іна Кузьміна адзначана дыпломам "Лепшая жаночая роля 2-га плана" за акцёрскую работу ў спектаклі па творы Леаніда Андрэева "Апавяданне пра сем павешаных".
Фаварытаў конкурснай праграмы ў розных намінацыях вызначыў савет міжнароднага журы пад старшынствам доктара мастацтвазнаўства Макі Васадзэ (Грузія).
Члены журы ў час цырымоніі закрыцця фестывалю адзначылі, што ў конкурснай праграме назіралася моцная канкурэнцыя, усе пастаноўкі былі яркімі, з цікавымі сцэнічнымі рашэннямі. У сувязі з гэтым было прынята рашэнне прысудзіць калектывам 8 спецыяльных дыпломаў. У прыватнасці, дыпломам "За падтрымку сучаснай беларускай драматургіі" ўзнагароджаны пастаянны ўдзельнік "Тэатральнага куфара" - студэнцкі тэатр "Tut" Тартускага ўніверсітэта (Эстонія).
Спектаклі студэнцкіх калектываў і тэатральных дзеячаў прайшлі на сцэнічнай пляцоўцы Ліцэя БДУ. У фестывалі прынялі ўдзел прадстаўнікі з 11 краін: Беларусі, Бельгіі, Вялікабрытаніі, Грузіі, Ірана, Латвіі, Літвы, Польшчы, Расіі, Украіны і Эстоніі.
Арганізатарам XII Міжнароднага фестывалю студэнцкіх тэатраў "Тэатральны куфар-2015" выступіла ўпраўленне па справах культуры БДУ.