Падзеі, факты, анонсы

3 кастрычніка, Магілёў /Сяргей Кулягін - БЕЛТА/. Госці з дзевяці краін прымуць удзел у міжнародным музычным фестывалі "Залаты шлягер", які пройдзе 22-29 кастрычніка ў Магілёве. Аб гэтым карэспандэнту БЕЛТА паведамілі ў Магілёўскай абласной філармоніі.

У праграме ўрачыстага адкрыцця заяўлены такія вядомыя імёны, як народная артыстка СССР Эдзіта П'еха, народная артыстка Беларусі Ядвіга Паплаўская, заслужаная артыстка Рэспублікі Беларусь Ірына Дарафеева, Віктар Рыбін і Наталля Сенчукова (Расія), Вольга Пірагс (Латвія), Афрык Сімон (Германія), Квенцін Мур (ЗША), Алег Жукаў, Настасся Ціхановіч (Беларусь), ансамбль "Добрыя Малайцы", група "Джой" (Аўстрыя).

Усе 7 дзён будуць насычаныя канцэртнымі праграмамі, мерапрыемствамі, творчымі праектамі, у якіх прымуць удзел зоркі эстрады, вядомыя музыканты і выканаўцы. Напрыклад, 25 кастрычніка адбудзецца сольны канцэрт народнага артыста Расіі Аляксандра Малініна. Магілёўская абласная філармонія рыхтуе да прэзентацыі спецыяльную праграму "Кінамузыка. Залатая калекцыя". Гледачоў чакаюць выступленні вакальна-інструментальнага ансамбля "Сіняя птушка" (Расія), аркестра баяністаў імя П. І. Смірнова пад кіраўніцтвам народнага артыста Расіі Ю. П. Смірнова, Нацыянальнага акадэмічнага канцэртнага аркестра Беларусі пад кіраўніцтвам Міхаіла Фінберга.

Яркім складнікам фестывалю стане канцэрт зорак сусветнага і айчыннага джаза з удзелам Вольгі Пірагс (Латвія), Квенціна Мура (ЗША), вакальнага квартэта Minsk Voises і Premier Orchestra (Беларусь). Урачыстае закрыццё форуму абяцае быць не менш зорным. У ім чакаецца ўдзел заслужанага артыста БССР Валерыя Дайнэкі, Ігара Карнелюка, Юрыя Лазы, Ірыны Шведавай, Аляксандра Сярова (Расія), Анжэя Векселя (Польшча), Дуэта "Бакара" (Іспанія), ансамбляў "Камерата", "Сіняя птушка" і іншых.

Міжнародны фестываль "Залаты шлягер" упершыню быў арганізаваны ў лістападзе 1995 года пры падтрымцы Прэзідэнта Беларусі. Музычны форум прыняты ў Міжнародную федэрацыю фестывальных арганізацый, якая аб'ядноўвае больш за 150 фестываляў мастацтваў. На фестывалі ў розны час удзельнічалі прызнаныя майстры сусветнага мастацтва больш як з 25 краін. Гэты творчы праект - унікальная з'ява ў культурным жыцці не толькі рэспублікі і вобласці, але і ў міжнародным жыцці ў цэлым. Гэта цудоўнае свята музыкі і песні, яго заўсёды вызначалі і вызначаюць высокае паэтычнае слова, глыбокі лірызм і сардэчнасць, паколькі ідэя фестывалю першапачаткова ўзнікла з жадання сабраць разам артыстаў, якія складаюць залаты фонд савецкай песні.