18 мая, Мінск /Кар. БЕЛТА/. Гімнастка Кацярына Галкіна заваявала два медалі на этапе Гран-пры ў ізраільскім Халоне, паведамляе карэспандэнт БЕЛТА.
Найбольш высокага рэзультату беларуска дабілася ў практыкаванні з мячом, заваяваўшы першае месца - 19,200 бала. Ёй удалося апярэдзіць аднаго з лідараў сезона расіянку Арыну Аверыну - 18,850, якая заняла другое месца. У практыкаванні з абручом Аверына стала першай, а Галкіна, атрымаўшы ад суддзяў 18,150 бала, заняла трэцяе месца.
У індывідуальных практыкаваннях у Халоне выступала і беларуска Юлія Еўчык, лепшы рэзультат якой чацвёртыя месцы ў практыкаваннях з булавамі і стужкай. У спаборніцтвах сярод юніёраў бронзавым прызёрам у практыкаванні з мячом стала Яна Стрыга.
У ходзе гэтага сезона беларускіх гімнастак чакаюць чэрвеньскі чэмпіянат Еўропы ў Гвадалахары і вераснёўскі чэмпіянат свету ў Сафіі.