Падзеі, факты, анонсы

"Гэта разумны і каварны драпежнік". Чаму ў Беларусі дазволілі паляванне на мядзведзя

Фота з архiва

16 жніўня, Мінск /Кар. БЕЛТА/. Чаму ў Беларусі дазволілі паляваць на мядзведзя, расказаў у праекце БЕЛТА "Краіна гаворыць" начальнік аддзела паляўнічай гаспадаркі Міністэрства лясной гаспадаркі Аляксандр Казарэз.

Паводле слоў Аляксандра Казарэза, задача павелічэння рэсурснай базы паляўнічай гаспадаркі была вырашана за некалькі дзесяцігоддзяў, у тым ліку дзякуючы рабоце Дзяржаўнай інспекцыі аховы жывёльнага і расліннага свету. Вельмі сур'ёзную ролю адыгралі мерапрыемствы па ўстараненні нелегальнага палявання і браканьерства. Колькасць жывёл значна вырасла, асабліва буйнакапытных - ласёў, аленяў, казуль.

У экалагічнай пірамідзе рост траваедных заўсёды прыводзіць да павелічэння колькасці драпежнікаў, гэта натуральны працэс, адзначыў ён. Таму колькасць драпежнікаў таксама пачала расці. Воўк у нас з'яўляецца паляўнічым відам і ім застаецца, а мядзведзь і рысь раней былі ахоўнымі відамі. Рост прыроднай кармавой базы, ахова паляўнічых угоддзяў і павышэнне экалагічнай самасвядомасці, у тым ліку сярод мясцовых жыхароў, садзейнічалі павелічэнню колькасці гэтых відаў. Плюс папуляцыя мядзведзяў на тэрыторыі ўсёй Еўразіі расце. Наша папуляцыя з'яўляецца часткай расійскай, якая насяляе паўночны захад РФ. Папуляцыя актыўна рассяляецца на беларускай тэрыторыі, і таму колькасць жывёл вырасла настолькі, што іх цяпер можна разглядаць як паляўнічыя віды", - растлумачыў Аляксандр Казарэз.

Начальнік аддзела дадаў, што вялікі драпежнік можа ствараць пэўныя праблемы для людзей, асабліва для сельскіх жыхароў, якія займаюцца пчалярствам і сельскай гаспадаркай. Адкрыццё палявання на гэтых жывёл стала адным з папераджальных крокаў.

Між іншым бурныя абмеркаванні палявання на мядзведзяў выкліканы тым, што ў гісторыі сучаснай Беларусі такога віду яшчэ не было. "Многія людзі па-ранейшаму ўспрымаюць мядзведзя як персанажа з мультфільма "Маша і мядзведзь": вельмі добры. Але трэба разумець, што нельга праецыраваць на дзікіх жывёл чалавечыя рысы. Мядзведзь - разумны, вельмі каварны драпежнік", - звярнуў увагу ён.

Цяпер афіцыйна паводле статыстыкі ў паляўнічых угоддзях Мінлясгаса лічыцца 1067 мядзведзяў. Аднак варта ўлічваць, што ёсць тэрыторыі, якія паляўнічымі ўгоддзямі не з'яўляюцца, - гэта асабліва ахоўныя прыродныя тэрыторыі, напрыклад Бярэзінскі біясферны запаведнік і заказнік "Налібоцкі". Гэтыя мядзведзі ў статыстыку паляўнічых гаспадарак не ўваходзяць. Па факце іх колькасць большая.

*Праект створаны за кошт сродкаў мэтавага збору на вытворчасць нацыянальнага кантэнту

версія для друку

зрабіць стартавай

дабавіць у выбранае