Падзеі, факты, анонсы

15 ліпеня, Мінск /Кар. БЕЛТА/. Пяціразовы паралімпійскі чэмпіён Лондана Ігар Бокій паспяхова выступае ў Кубку Беларусі па плаванні памяці Барыса Сівіцкага, у якім прымаюць удзел і ўсе вядучыя, за выключэннем Паўла Санковіча, беларускія плыўцы. Ігару Бокію ўдалося за два дні спаборніцтваў ужо тройчы ўзняцца на вышэйшую прыступку п'едэстала гонару, паведамляе карэспандэнт БЕЛТА.

На рахунку атлета перамога ў рашаючых заплывах на 200 м вольным стылем (1 мін 54,64 сек), на 400 м вольным стылем (4 мін 00,58 сек) і ў складзе Мінскай вобласці ў эстафеце 4х200 м вольным стылем. На спрынтарскіх дыстанцыях у басейне брэсцкага Палаца водных відаў спорту тон задаюць плыўцы нацыянальнай зборнай. У фінале на 50 м вольным стылем Арцём Мачэкін апярэдзіў Яўгена Цуркіна, праплыўшы дыстанцыю за 22,58 сек. Няма роўных у плаванні на спіне магіляўчаніну Мікіту Цмыгу, які да першага месца на 50 м у гэтым відзе, дадаў і перамогу на 200 м (2 мін 01,45 сек).

Рэкардсмен Беларусі ў плаванні на 100 м брасам (1 мін 00,40 сек) Ілья Шымановіч таксама не страчвае надзеі накіравацца ў Рыа-дэ-Жанэйра. Яго рэзультат, паказаны ў першы дзень спаборніцтваў 13 ліпеня, адпавядае нарматыву "А" для кваліфікацыі на Алімпійскія гульні, але, на жаль, тэрмін падачы заявак у Міжнародную федэрацыю плавання (ФІНА) аб выкананні нарматываў скончыўся 3 ліпеня.

Сёння ў Палацы водных відаў спорту ў Брэсце будзе разыграна 11 камплектаў узнагарод. Завершыцца Кубак Беларусі, які з'яўляецца важным праверачным стартам перад летнімі Гульнямі, 16 ліпеня.