Падзеі, факты, анонсы

Фотавыстава БЕЛТА "Суверэнная Беларусь" праходзіць у Бялградзе

Фота з архiва

17 кастрычніка, Мінск /Кар. БЕЛТА/. Фотавыстава "Суверэнная Беларусь", падрыхтаваная Беларускім тэлеграфным агенцтвам, праходзіць у Бялградзе ў будынку Саюза журналістаў Сербіі. Аб гэтым паведамляе БЕЛТА са спасылкай на беларускую загранустанову ў гэтай краіне.

Мерапрыемства арганізавана пасольствам Беларусі ў Сербіі сумесна з бялградскай галерэяй "Аксіяс". На цырымоніі адкрыцця прысутнічалі прадстаўнікі сербскіх міністэрстваў і ведамстваў, Народнай Скупшчыны, дыпламатычнага корпуса, СМІ і грамадскасці.

Надзвычайны і Паўнамоцны Пасол Рэспублікі Беларусь у Сербіі Сяргей Маліноўскі падзякаваў прадстаўнікам Міністэрства культуры гэтай краіны, кіраўніцтву і камандзе галерэі "Аксіяс" за падтрымку і дапамогу ў арганізацыі экспазіцыі. Ён адзначыў, што супрацоўніцтва ў галіне культуры ўносіць неацэнны ўклад у развіццё міжчалавечых сувязей і дружалюбных адносін паміж Беларуссю і Сербіяй.

Дыпламат выказаў надзею, што прадстаўленыя на выставе фатаграфіі, якія адлюстроўваюць прыгажосць прыроды, гістарычныя помнікі і традыцыі, а таксама сучасныя дасягненні суверэннай Беларусі ў прамысловасці, сельскай гаспадарцы і многіх іншых сферах, дадуць магчымасць наведвальнікам азнаёміцца або лепш пазнаць, зразумець нашу краіну.

Дырэктар галерэі "Аксіяс" Ясміна Дзебяляк падзялілася сваімі асабістымі ўражаннямі ад наведвання Беларусі ў час удзелу ў міжнародным фестывалі "Славянскі базар у Віцебску" ў якасці суарганізатара выставы сербскага сучаснага мастацтва. Яркім мастацкім момантам цырымоніі адкрыцця выставы стала песня на беларускай мове "Зроблена ў Беларусі", выкананая беларускай спявачкай Дар'яй Ісаковіч.

Фотаэкспазіцыя БЕЛТА "Суверэнная Беларусь" у гістарычным цэнтры Бялграда адкрылася 15 кастрычніка і прадоўжыцца два тыдні.

версія для друку

зрабіць стартавай

дабавіць у выбранае