Падзеі, факты, анонсы

17 мая, Мінск /Кар. БЕЛТА/. Па ініцыятыве Беларусі 17 мая адбудзецца цырымонія адкрыцця першай фотавыстаўкі Групы сяброў сям'і і амерыканскіх няўрадавых арганізацый, прысвечанай важнаму ўкладу сям'і ва ўстойлівае развіццё, паведамілі БЕЛТА ў прэс-службе Міністэрства замежных спраў.

Фотавыстаўка стане прадаўжэннем серыі мерапрыемстваў з нагоды Міжнароднага года сям'і.

У прэс-службе знешнепалітычнага ведамства расказалі, што 16 мая ў штаб-кватэры ААН у Нью-Ёрку намеснік міністра замежных спраў Беларусі Валянцін Рыбакоў прыняў удзел у якасці асноўнага дакладчыка ў спецыяльным пасяджэнні высокага ўзроўню "Аб'ядноўваючы нацыі за мір, спрыяльны для сям'і". Мерапрыемства праведзена па ініцыятыве Беларусі пры падтрымцы Групы сяброў сям'і сумесна з ключавымі амерыканскімі няўрадавымі арганізацыямі, якія выступаюць у падтрымку традыцыйнай сям'і, і прысвечана Міжнароднаму дню сям'і, што адзначаецца ў свеце 15 мая.

У сваім выступленні ад імя Групы сяброў сям'і Валянцін Рыбакоў праінфармаваў аб яе падыходах па папулярызацыі традыцыйнай сям'і ў рамках выканання міжнароднага парадку дня ў галіне ўстойлівага развіцця. Намеснік міністра замежных спраў прадставіў сумесную заяву Групы сяброў у падтрымку традыцыйнай сям'і, якая з'яўляецца першым дакументам у ААН такога фармату. У прыватнасці, у заяве адзначаецца ключавая роля сям'і ў развіцці грамадства, а таксама важнасць фарміравання трывалых партнёрскіх сувязей паміж пакаленнямі. У ёй таксама падкрэсліваецца, што без уліку інтарэсаў сям'і дасягнуць мэт устойлівага развіцця будзе немагчыма. Заява будзе апублікавана ў якасці афіцыйнага дакумента 70-й сесіі Генеральнай Асамблеі ААН.

Група сяброў сям'і створана ў 2015 годзе, і ў яе склад уваходзяць 25 дзяржаў з усіх рэгіёнаў свету. Яна адстойвае інтарэсы традыцыйнай сям'і і сямейных каштоўнасцей у адпаведнасці з вызначэннем сям'і, адлюстраваным у міжнародна прызнаных дакументах.