Падзеі, факты, анонсы
Фотапраекцыі шагалаўскага Віцебска пакажуць на выставе да 130-годдзя мастака
6 чэрвеня, Віцебск /Кацярына Князева - БЕЛТА/. Выстава фотапраекцый Віктара Барысенкава "Як даўно, мой горад любімы, я не бачыў цябе…" адкрыецца ў Арт-цэнтры Марка Шагала 8 чэрвеня, паведаміла карэспандэнту БЕЛТА дырэктар Музея Марка Шагала Ірына Воранава.
Віктар Барысенкаў прысвяціў экспазіцыю 130-годдзю з дня нараджэння Марка Шагала. Гледачы ўбачаць гістарычныя фотарэканструкцыі тых мясцін Віцебска, якія адзначаны ўспамінамі мастака і яго жонкі ў аўтабіяграфічных кнігах "Маё жыццё" і "Запаленыя агні". "Віцебск непарыўна звязаны з імем Марка Шагала і вядомы сёння ўсяму свету дзякуючы яму, - расказвае Віктар Барысенкаў. - Радкі "Як даўно, мой горад любімы, я не бачыў цябе..." з'яўляюцца часткай паэтычнага звароту мастака "Да майго горада Віцебска", апублікаванага 15 лютага 1944 года ў Нью-Ёрку ў часопісе "Эйнікайт" ("Адзінства"). Гэта верш у прозе - прызнанне ў любові да роднага горада, своеасаблівае пасланне скрозь час і прастору".
Супрацоўнік Віцебскага карданажна-паліграфічнага камбіната "Пакроўскі" Віктар Барысенкаў вядомы ў Віцебску як краязнавец і аўтар гістарычных фотарэканструкцый. Ён спалучае вывучэнне віцебскай даўніны, у прыватнасці здымкаў і паштовак, на якіх адлюстраваны горад у пазамінулым і мінулым стагоддзях, фотаздымку сучасных яго краявідаў з тых жа ракурсаў і сумяшчэнне гэтых выяў пры дапамозе камп'ютарных тэхналогій. У выніку атрымліваецца гістарычная фотарэканструкцыя, або таймераграфія.
Работы Віктара Барысенкава як своеасаблівае сумяшчэнне часу і прасторы дапамагаюць паглядзець на стары Віцебск Марка Шагала ў сучасным кантэксце. Фотапраекцыі дапоўнены цытатамі з успамінаў Марка і Бэлы Шагал.
версія для друку
зрабіць стартавай
дабавіць у выбранае