17 чэрвеня, Мінск /Кар. БЕЛТА/. Вырашальны этап Лігі чэмпіёнаў па міні-футболе 2020 года перанесены з Мінска ў іспанскую Барселону. Такое рашэнне прыняў сёння выканкам УЕФА, паведамляе карэспандэнт БЕЛТА.
Першапачаткова "Фінал чатырох" павінен быў прайсці 24-26 красавіка на паркеце "Мінск-Арэны" з удзелам іспанскіх клубаў "Барселона" і "Мурсія", а таксама расійскіх "Цюмені" і КПРФ з Масквы. Аднак у сувязі з пандэміяй каранавіруса УЕФА спачатку адклаў турнір на нявызначаны тэрмін, а сёння вырашыў перанесці яго ў Барселону на 8-11 кастрычніка.
У адпаведнасці з рашэннем УЕФА, беларуская сталіца стане гаспадаром наступнага сезона "Фіналу чатырох" Лігі чэмпіёнаў па міні-футболе, які намечаны на красавік 2021 года.