Падзеі, факты, анонсы

Фатограф БЕЛТА ўвайшоў у шорт-ліст намінантаў сусветнага конкурсу спартыўнай журналістыкі за 2020 год

Фатаграфія "Небяспечная гульня" Дзяніса Касцючэнкі

18 лютага, Мінск /Кар. БЕЛТА/. Пазаштатны карэспандэнт БЕЛТА Дзяніс Касцючэнка з фатаграфіяй "Небяспечная гульня" ўвайшоў у шорт-ліст намінантаў сусветнага конкурсу спартыўнай журналістыкі AIPS Sport Media Awards за 2020 год, паведамляе БЕЛТА.

Намінант не ўтойваў станоўчых эмоцый ад паведамленняў, атрыманых з Лазаны (Швейцарыя), дзе знаходзіцца штаб-кватэра прафесійнага органа, які прадстаўляе міжнародныя спартыўныя СМІ.

"Безумоўна, гэта важная падзея ў маёй кар'еры. Зразумела, што святкаваць поспех яшчэ рана. Усё ж трыумфатары конкурсу будуць вядомы пазней. Тым не менш нагода для гонару ёсць. Не так часта беларускія спартыўныя фатографы становяцца суіскальнікамі ўзнагарод у такіх прэстыжных прафесійных спаборніцтвах. Трэба разумець, што работа, якая трапіла ў шорт-ліст, была зроблена на матчы чэмпіянату Беларусі па футболе. Супала шмат розных фактараў. Зрабіць здымак для міжнароднага конкурсу на спаборніцтвах топ-узроўню, дзе выступаюць зоркі першай велічыні і створаны спецыяльныя ўмовы для работы фотакарэспандэнтаў, значна лягчэй, чым на рэспубліканскіх стартах. Здымак атрымаўся вельмі сур'ёзным. Вядома, хацелася, каб яго ацанілі члены міжнароднага журы, таму вельмі рады яго з'яўленню ў шорт-лісце AIPS Sport Media Awards", - сказаў Дзяніс Касцючэнка.

Сусветная прэмія AIPS Sport Media Awards з'яўляецца вышэйшай міжнароднай узнагародай у галіне спартыўнай медыяіндустрыі. Прэмія ўручаецца ў знак прызнання заслуг лепшых аўтараў, якія выступаюць у розных жанрах спартыўнай журналістыкі - ад фота- і відэарэпартажаў, друкаваных артыкулаў і матэрыялаў у лічбавым фармаце да файлаў у фармаце падкастаў і заканчваючы спартыўнымі блогамі. У бягучым годзе ўзнагароды знойдуць сваіх уладальнікаў у васьмі дарослых і трох юнацкіх катэгорыях. У 2020 годзе заяўкі падаў 1871 прэтэндэнт са 129 краін. Пераможцы ў дарослых намінацыях атрымаюць грашовы прыз $8 тыс. за першае месца, $3 тыс. за другое і $2 тыс. за трэцяе месца.

версія для друку

зрабіць стартавай

дабавіць у выбранае