Падзеі, факты, анонсы

Фантасмагорыя і сюррэалізм: выстаўку скульптур "Метамарфозы" прадставяць у Мінску

Фота minskmuseum.by

11 мая, Мінск /Кар. БЕЛТА/. Адкрыццё выстаўкі скульптур Віктара Мінко "Метамарфозы" адбудзецца 13 мая ў Гарадской мастацкай галерэі твораў Л.Д. Шчамялёва. Аб гэтым БЕЛТА паведамілі ў прэс-службе ўстановы.

На выстаўцы прадстаўлены работы скульптара з 1994 па 2017 год. Работы мастака адначасова рэалістычныя і вобразныя. Майстар працуе з метафарамі і сімваламі еўрапейскай культуры. Паводле ўласнага прызнання, скульптар натхняецца фантасмагарычнымі і сюррэалістычнымі творамі трох геніяў - Іераніма Босха, Пітэра Брэйгеля і Рэнэ Магрыта.

"Скульптурныя кампазіцыі нясуць у сабе адбітак лаканічнасці і манументальнасці. Аўтар выбірае шлях сінтэзу фантазійнага і рэальнага. Парадаксальная вобразнасць кожнай з работ нараджаецца дзякуючы валоданню скульптарам нюансамі асаблівай візуальнай і пластычнай гульні з гледачом. Віктар Мінко змешвае ў пластычных формах фрагменты механізмаў і прадметаў, целы людзей, жывёл, хімер. Усе дэталі аўтар перадае з анатамічнай дакладнасцю, праз метамарфозы раскрываючы сутнасць рэчаў. Арнаментальныя ўзоры Віктара Мінко арганічна аплятаюць паверхні бронзавых скульптур, якія ўражваюць злучэннем розных фактур, вобразаў, сэнсаў", - расказалі ў прэс-службе.

Віктар Мінко - беларускі скульптар, член Беларускага саюза мастакоў, удзельнік шматлікіх персанальных і калектыўных выставак у Беларусі, Бельгіі, Вялікабрытаніі, Італіі, Нідэрландах, ЗША. Творчае крэда мастака - самаідэнтыфікацыя праз пошук незвычайнага ў звычайным.

Выстаўка прадоўжыцца па 26 чэрвеня.

версія для друку

зрабіць стартавай

дабавіць у выбранае