У Беларусь без візы на 30 дзён
Афіцыйны сайт Рэспублікі Беларусь
Год малой радзімы ў Беларусі
Прэс-цэнтр
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Прэс-цэнтр | Падзеі, факты, анонсы

Падзеі, факты, анонсы

14 Сак 2019

Джазавыя ночы, КВЗ і лядовае шоу ўключаны ў праграму "Славянскага базару-2019"

Джазавыя ночы, КВЗ і лядовае шоу ўключаны ў праграму

14 сакавіка, Мінск /Кар. БЕЛТА/. Праграма XXVIII Міжнароднага фестывалю мастацтваў "Славянскі базар у Віцебску" будзе максімальна разнажанравай і арыентаванай на аўдыторыю ўсіх узростаў, але перш за ўсё на моладзь. Аб гэтым паведаміў сёння журналістам у Мінску дырэктар фестывалю і кіраўнік Цэнтра культуры "Віцебск" Глеб Лапіцкі, перадае карэспандэнт БЕЛТА.

"Для моладзі мы павінны падрыхтаваць тую пляцоўку, якая адпавядае іх патрабаванням. Хочам паказаць шырока ўсю нашу сучасную разнажанравую культуру. Больш за 200 мерапрыемстваў запланавана", - сказаў Глеб Лапіцкі. Ён падкрэсліў, што сярод новаўвядзенняў фестывалю нямала прапанаваных гледачамі, бо "гэта народны праект, індыкатар таго, як мы ўмеем святкаваць і прымаць гасцей". Напрыклад, фан-клуб Аляксандра Панаётава дабіўся таго, што дырэкцыя форуму мастацтваў уключыла ў праграму канцэрт артыста.

Сярод імён на афішах - Стас Міхайлаў, Валерый Лявонцьеў, Тамара Гвердцытэлі, Надзея Кадышава і ансамбль "Залатое кальцо", рок-група "Кіпелаў" і інш. Адбудзецца начное шоу Europa Plus, імёны пяці першых яго ўдзельнікаў прадстаўлены публіцы, астатнія пакуль не называюцца, каб захаваць інтрыгу, адзначыў дырэктар фестывалю.

Ён асабліва падкрэсліў, што "Славянскі базар" распаўсюджваецца значна шырэй за Летні амфітэатр. Так, у бягучым годзе плошча Перамогі ў Віцебску стане месцам вялікага опэн-эйр, які прадоўжыцца з 11 па 15 ліпеня. "Гэта будуць і начныя тэатральныя паказы, упершыню пройдуць фестываль аўтагуку і фестываль кавер-бэндаў. Выступяць нашы любімыя групы NaviBand, "Без Білета", "J:Морс" і іншыя. І пастараемся адкрыць новыя імёны, якія потым збіраюць мільёны праглядаў у YouTube і ім апладзіруе ўвесь свет", - анансаваў Глеб Лапіцкі.

З'явіцца ў праграме і лядовае шоу: у Віцебск прыедзе прафесійны класічны балет на лёдзе з Санкт-Пецярбурга. Вяртаецца ў музычную палітру фестываля і джаз. "Прычым мы звяртаемся не толькі да гледача, але і да тых, хто прыязджае на форум працаваць. Таму прапануем новы фармат - "джазавыя ночы ў дырэкцыі фестывалю". Гэта будзе пляцоўка, дзе будуць іграць класныя музыканты. Да нас прыедуць уладальнікі Grammy, джазмены сусветнага ўзроўню", - адзначыў Глеб Лапіцкі.

Дырэктар ТАА "АМІК медыя", дырэктар тэлевізійнай міжнароднай лігі Міжнароднага саюза КВЗ Сяргей Сярбун расказаў, што праект КВЗ збярэ нямала любімых і яшчэ набіраючых папулярнасць каманд: "Трыёд і дыёд" са Смаленска, "Саюз" з Цюмені, "Плюшкі імя Яраслава Мудрага" з Цверы, "Руская дарога" з Армавіра. Беларусь будуць прадстаўляць каманда "Беларусы" (ад МТЗ), якая гуляе ў міжнароднай лізе, і падрастаючае пакаленне - дзіцячая каманда з Віцебска.

Аднак "мадэрнізацыя" фестывалю са шматгадовай гісторыяй не азначае ломку традыцый. "Наш фестываль вызначаецца асаблівай атмасферай, гэта тое, за што яго цэняць. І мы будзем старацца яе не страціць, каб усім на фестывалі было добра", - падкрэсліў Глеб Лапіцкі. Ён дадаў, што менавіта за атмасферу многія артысты нават згаджаюцца на меншыя ганарары - таму што ім самім вельмі хочацца быць удзельнікамі свята ў Віцебску.

Міжнародны фестываль мастацтваў "Славянскі базар у Віцебску" пройдзе з 8 па 17 ліпеня. Урачыстая цырымонія і гала-канцэрт адкрыцця форуму адбудуцца ў Летнім амфітэатры 11 ліпеня, закрыцця - 15 ліпеня. Дадатковыя мерапрыемствы запланаваны на 8-10 і 16-17 ліпеня. Асноўнымі падзеямі фестывалю стануць XXVIII Міжнародны конкурс выканаўцаў эстраднай песні "Віцебск-2019" і XVII Міжнародны дзіцячы музычны конкурс "Віцебск-2019". Захаваюцца любімыя паклоннікамі фестывалю "Тэатральныя сустрэчы", фестываль вулічнага мастацтва "На сямі вятрах", лялечны квартал, вечары ў Віцебскай абласной філармоніі і іншыя праекты.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі
Партызанскі летапіс