Падзеі, факты, анонсы
Дзень беларускага кіно прайшоў у Ціраспалі
29 мая, Кішынёў /Андрэй Гусін - БЕЛТА/. У Ціраспалі - сталіцы Прыднястроўскага рэгіёна Малдовы прайшоў Дзень беларускага кіно, прымеркаваны да Дня пагранічніка і 70-годдзя Перамогі ў Вялікай Айчыннай вайне, у час якога ў кінаканцэртным комплексе "Ціраспаль" адбыўся паказ фільма "Брэсцкая крэпасць", паведамляе карэспандэнт БЕЛТА.
Арганізатарам кінапаказу выступіла пасольства Беларусі ў Малдове і Таварыства беларускай культуры. У мерапрыемстве прынялі ўдзел саветнік пасла Беларусі ў Малдове Аляксандр Салаўёў і намеснік міністра замежных спраў Прыднястроўя Ігар Шорнікаў.
Паводле паведамлення МЗС Прыднястроўя, адкрываючы паказ кінастужкі, Аляксандр Салаўёў адзначыў, што абарона Брэсцкай крэпасці мела не толькі ваеннае, але і вялікае духоўнае значэнне. "Гэта быў першы пераломны момант у вайне, нягледзячы на тое, што гэта быў дзень еe пачатку. На працягу больш як тыдня да апошняга салдата-пагранічніка крэпасць стаяла і не здавалася. І на сцяне крэпасці да гэтага часу захаваўся надпіс "паміраю, але не здаюся". Вайна прайшла ў нас праз кожную сям'ю, таму для Беларусі гэта свята і цэннае", - сказаў Аляксандр Салаўёў, падкрэсліўшы, што ў Вялікай Айчыннай вайне беларускі народ страціў кожнага трэцяга жыхара краіны.
Расказваючы пра саму кінастужку, беларускі дыпламат адзначыў, што фільм быў выраблены на кінастудыі "Беларусьфільм" і з'яўляецца праектам Саюзнай дзяржавы Расіі і Беларусі.
У сваю чаргу Ігар Шорнікаў выказаў словы ўдзячнасці паслу Беларусі ў Малдове і Таварыству беларускай культуры за арганізацыю мерапрыемства. "Беларусь - дзяржава, у якой свята шануюць сваю гісторыю і гістарычную памяць. У Прыднястроўі пражываюць каля 20 тыс. беларусаў. І сувязі з Беларуссю для Прыднястроўя вельмі важныя", - адзначыў ён.
версія для друку
зрабіць стартавай
дабавіць у выбранае