Падзеі, факты, анонсы
"Дон Кіхот" і "Севільскі цырульнік" адкрыюць новы сезон у Вялікім тэатры Беларусі
Фота з архiва
29 жніўня, Мінск /Кар. БЕЛТА/. Вялікі тэатр Беларусі пачне сезон з паказу балета "Дон Кіхот" 8 верасня і оперы "Севільскі цырульнік" 9 верасня, паведамілі БЕЛТА ва ўстанове.
У галоўных партыях гледачы ўбачаць маладых зорак оперы і балета. У балетнай пастаноўцы Валянціна Елізар'ева будуць задзейнічаны Людміла Хітрова і Дзмітрый Уксуснікаў. У оперным спектаклі рэжысёра Альда Тарабэлы ўпершыню выканае ролю Фігара Аляксей Макшанцаў, а дэбютамі для Андрэя Мацюшонка і Настассі Міхнавец стануць партыі Графа Альмавіва і Разіны.
Парад прэм'ер 10 верасня прадоўжыць рамантычны балет Адольфа Адана "Жызэль" у пастаноўцы Ігара Колба. Галоўную ролю выканае маладая таленавітая артыстка Лізавета Мусорына.
Год таму Вялікі тэатр Беларусі і Марыйскі дзяржаўны акадэмічны тэатр оперы і балета імя Э.Сапаева падпісалі мемарандум аб творчым супрацоўніцтве. Восенню таго ж года беларускія салісты оперы прынялі ўдзел у фестывалі опернага мастацтва на сцэне тэатра ў Іашкар-Але, а 25 мая 2023 года балетная трупа Вялікага тэатра Беларусі сустрэла 90-гадовы юбілей свайго роднага тэатра на гастролях. На сцэне ў Іашкар-Але артысты танцавалі балет "Ганна Карэніна" на музыку Пятра Чайкоўскага ў пастаноўцы Вольгі Костэль.
У час абменных гастроляў Марыйскі дзяржаўны акадэмічны тэатр оперы і балета вязе ў Мінск дзве пастаноўкі: 12 верасня гледачы ўбачаць спектакль "Рускі Гамлет", 13-га - балет "Папялушка". 22 і 23 верасня адбудзецца паказ оперы "Турандот" і балета "Спартак" Растоўскага дзяржаўнага музычнага тэатра. Музычным кіраўніком і дырыжорам двух спектакляў выступіў галоўны дырыжор Растоўскага дзяржаўнага музычнага тэатра беларус Андрэй Іваноў. У лістападзе ў Беларусь таксама павінна прыехаць трупа Вялікага тэатра Расіі.
Першая прэм'ера 91-га сезона ў Вялікім тэатры - балет "Ілюзіі кахання" галоўнага балетмайстра тэатра і заслужанага артыста Расіі Ігара Колба - адбудзецца ў самым пачатку зімы.
версія для друку
зрабіць стартавай
дабавіць у выбранае