Падзеі, факты, анонсы

"Дні еўрапейскай спадчыны - шырокамаштабная культурная акцыя, якая праводзіцца дзяржавамі, што ратыфікавалі Еўрапейскую культурную канвенцыю. Беларусь знаходзіцца ў ліку іх. Кожны год краіны - удзельніцы канвенцыі прапагандуюць уласныя тэмы гэтага міжнароднага праекта. Дні еўрапейскай спадчыны-2015 у Беларусі прысвечаны тэме індустрыяльнай спадчыны", - расказала Наталля Хвір.

Паводле яе слоў, сёння набывае актуальнасць пытанне далікатнага ўключэння прамысловай спадчыны Беларусі ў сучасны кантэкст жыцця, у тым ліку ў турыстычную сферу. Індустрыяльная спадчына - неад'емная частка агульнай культурнай спадчыны, якая звязана з сацыяльна-эканамічнай, вытворчай і навукова-тэхнічнай дзейнасцю чалавека. Індустрыяльная спадчына ўключае ў сябе архітэктуру і канструкцыі гістарычных прамысловых будынкаў, іх вытворчае абсталяванне, узоры прадукцыі і вытворчыя тэхналогіі. Гэта прадукт дзейнасці індустрыяльнай і даіндустрыяльнай фаз развіцця грамадства, і ён забяспечвае гісторыка-культурную пераемнасць.

У апошнія дзесяцігоддзі пытанні захавання індустрыяльнай спадчыны набылі ў свеце вялікую значнасць і актуальнасць, адзначыла Наталля Хвір. Рухаючымі сіламі гэтых працэсаў сталі імклівыя змяненні ў сферы вытворчасці, калі грамадства ў розных краінах пераходзіць ад індустрыяльнай да постіндустрыяльнай стадыі, прамысловыя прадпрыемствы закрываюцца і паўстае пытанне, што рабіць у далейшым з іх будынкамі і абсталяваннем. "Адбываецца працэс гуманізацыі грамадскай свядомасці, узрастае цікавасць грамадства да гісторыі і культуры, у тым ліку індустрыяльнай, прычым не толькі рэгіянальнай або нацыянальнай, але і сусветнай. Павялічваецца цікавасць да выкарыстання індустрыяльнай спадчыны ў адукацыйных і турыстычных мэтах", - сказала спецыяліст.

Акцыя "Дні еўрапейскай спадчыны-2015" пройдзе вечарам 24 верасня на вуліцы Кастрычніцкай, 23. Праграма ўключае выстаўку рэтрааўтамабіляў, арт-кірмаш, прэзентацыю графіці, адкрыццё фотавыстаўкі, выступленне паэтаў, музыкантаў, экскурсію па гістарычным прадмесці "Ляхаўка".