Падзеі, факты, анонсы

Дамарацкая стала бронзавым прызёрам Кубка наймацнейшых на дыстанцыі 1500 м

Ганна Дамарацкая. Фота з архiва

28 лютага, Мінск /Кар. БЕЛТА/. Беларуска Ганна Дамарацкая заваявала чацвёрты медаль Кубка наймацнейшых спартсменаў па канькабежным спорце ў "Мінск-Арэне", паведамляе карэспандэнт БЕЛТА.

Праграму спаборніцтваў заключнага дня турніру адкрылі жаночыя забегі на дыстанцыі 1500 м, удзел у якіх прынялі сем расіянак і адзіная прадстаўніца Беларусі Ганна Дамарацкая. Наша спартсменка ў выніку паказала трэці рэзультат (2 мін. 00,71 сек.), уступіўшы пераможцы Аляксандры Саюцінай больш за дзве секунды. Сярэбраная медалістка Настасся Сямёнава апярэдзіла беларуску на 0,61 сек. Лідар нашай каманды на гэтай дыстанцыі Кацярына Гагіева на старт не выйшла.

Такім чынам, Ганна Дамарацкая сабрала поўны камплект дамашняга турніру: раней беларуска ўзяла дзве залатыя ўзнагароды (1000 м, камандны спрынт) і адну сярэбраную (500 м). Далей медалі на дыстанцыі 1500 м разыграюць мужчыны. Заключным відам праграмы Кубка наймацнейшых спартсменаў па канькабежным спорце ў "Мінск-Арэне" стануць гонкі з масавым стартам.

версія для друку

зрабіць стартавай

дабавіць у выбранае