Падзеі, факты, анонсы

Чэмпіянат і першынство Беларусі па прыбярэжным вяслярным спрынце правядуць у Брэсце

Фота з архiва

11 жніўня, Брэст /Кар. БЕЛТА/. У Брэсце з 12 па 15 жніўня на Цэнтральнай набярэжнай і вяслярным канале пройдуць чэмпіянат і першынство Беларусі па прыбярэжным вяслярным спрынце. Аб гэтым паведамілі карэспандэнту БЕЛТА ў Брэсцкім абласным цэнтры алімпійскага рэзерву па веславанні.

"Спаборніцтвы рэспубліканскага ўзроўню ў гэтым фармаце будуць праведзены ўпершыню. Прыбярэжны спрынт - новая для Беларусі дысцыпліна, якая спалучае бег, веславанне і высокую скорасць. Спартсмены стартуюць з берага, пераадольваюць кароткі бегавы ўчастак, затым садзяцца ў лодку і праходзяць дыстанцыю 500 м, пасля чаго зноў вяртаюцца да берага і фінішуюць бегам", - расказалі ў цэнтры.

Парад адкрыцця адбудзецца 14 жніўня ў 14:30. На працягу двух дзён гледачы змогуць убачыць адборачныя, папярэднія, чвэрцьфінальныя, паўфінальныя і фінальныя заезды.

У чэмпіянаце выступяць 50 дарослых спартсменаў - зборныя абласцей і Мінска. Столькі ж удзельнікаў заяўлена і ў першынстве краіны, дзе спаборнічаюць юніёры і юніёркі 2008-2009 гадоў нараджэння. Адборачныя заезды пачнуцца 14 жніўня: у 9:00 - сярод дарослых, у 11:00 - сярод юніёраў. "Відовішчнасць заездаў лепш за ўсё раскрываецца менавіта на адкрытай пляцоўцы гарадскога пляжа ў раёне Цэнтральнай набярэжнай", - адзначылі ў цэнтры.

Спаборніцтвы стануць адборачнымі для фарміравання складу на ўдзел у чэмпіянатах Еўропы і свету па прыбярэжным вяслярным спрынце.

версія для друку

зрабіць стартавай

дабавіць у выбранае