Падзеі, факты, анонсы
Брэсцкі тэатр драмы пакажа "Мяшчанскае вяселле" на фестывалі ў Санкт-Пецярбургу
Фота з архiва
17 мая, Брэст /Кар. БЕЛТА/. Брэсцкі акадэмічны тэатр драмы прадставіць спектакль "Мяшчанскае вяселле" на XXIII Міжнародным тэатральным фестывалі краін СНД і Балтыі "Сустрэчы ў Расіі", паведаміла карэспандэнту БЕЛТА памочнік мастацкага кіраўніка Алеся Бурдзіна.
Тэатральны форум праходзіць у Санкт-Пецярбургу з 13 па 18 мая. Фестывальную афішу склалі восем спектакляў розных жанраў рускамоўных тэатраў блізкага замежжа - Беларусі, Грузіі, Арменіі, Казахстана і Малдовы. Нашу краіну прадстаўляюць два калектывы. Гродзенскі абласны тэатр лялек 15 мая паказаў спектакль "Дэман" паводле паэмы М.Ю. Лермантава. Брэсцкі акадэмічны тэатр закрывае праграму свята.
"Такая ганаровая місія выпадае нашаму тэатру другі раз. У 2019 годзе камедыяй "Нявольніцы" мы таксама закрывалі форум. Да гэтага паказвалі спектаклі "Дзядзька Ваня" і "Над безданню ў жыце". Гэта ўжо чацвёртае наша наведванне фестывалю. Уражанні ад Піцера заўсёды былі самыя добрыя. Спадзяёмся, і новая сустрэча не стане выключэннем", - сказала Алеся Бурдзіна.
Гратэскную камедыю з элементамі клаўнады паводле п'есы Бертальда Брэхта "Мяшчанскае вяселле" пакажуць вечарам 18 мая на вялікай сцэне Тэатра-фестывалю "Балтыйскі дом". Спектакль быў намініраваны на Нацыянальную тэатральную прэмію і стаў адной з самых папулярных пастановак БАТД апошніх сезонаў. Яркая работа запрошанага рэжысёра Ігара Казакова заваявала прызнанне гледачоў не толькі ў Брэсце. Яе з цеплынёй прымалі на фестывалі "ТЭАРТ" у Мінску, падчас гастроляў тэатра ў Магілёве і Віцебску.
У чэрвені камедыю-буф змогуць убачыць і гледачы ў Гомелі. БАДТ плануе абменныя гастролі з абласным драмтэатрам. Акрамя "Мяшчанскага вяселля", брэсцкія артысты пакажуць камедыю ў стылі рэтра паводле п'есы Аляксандра Вампілава "Старэйшы сын" і казку "Як Кашчэй ажаніўся". Гомельскі тэатр мае намер прывезці ў Брэст спектаклі "Цыяністы калій... З малаком або без?", "Вынаходлівая закаханая" і казку-здарэнне "Ратуйце Мігай Светафорыча".
версія для друку
зрабіць стартавай
дабавіць у выбранае