Падзеі, факты, анонсы

Надзея Васільчанка адзначыла высокую цікавасць да конкурсу ў бягучым годзе. Арганізатары атрымалі эскізы 450 калекцый, 100 з іх, прадстаўленыя 118 дызайнерамі, выйшлі ў фінал. У паказах, якія адбудуцца 17 мая ў Палацы спорту, прымуць удзел 120 мадэлей.

Дырэктар цэнтра пераканана, што многія калекцыі, прадстаўленыя ў конкурсе, можна і сёння запускаць у вытворчасць. "Ёсць шмат цікавых прыкладаў. Мы бачым сваю задачу ў тым, каб дапамагаць нашым дызайнерам выходзіць на рынак. Разлічваем на дапамогу "Беллегпрама", - сказала Надзея Васільчанка.

Загадчыца аддзела моды і дызайну Нацыянальнага цэнтра мастацкай творчасці дзяцей і моладзі Святлана Гнядзёнак у сваю чаргу дадала, што гледачы, напэўна, ацэняць незвычайны творчы падыход маладых беларускіх мадэльераў. Ім цікавыя такія напрамкі, як футурызм, фолк і іншыя. "У фінал выйшлі самыя моцныя калекцыі, якія не сорамна паказваць шырокай публіцы. Думаю, што мы ў тэндэнцыях, хацелася б, каб гэта адлюстроўвалася ў нашай лёгкай прамысловасці", - адзначыла Святлана Гнядзёнак.

Галоўны прыз "Млына моды-2017" - удзел у міжнародных творчых майстэрнях, знаёмства з вядучымі замежнымі школамі і магчымасць стаць удзельнікам паказаў на адной з пляцовак за мяжой. У мінулым годзе прызёры адправіліся ў Варшаву і Кракаў.

Фестываль-конкурс "Млын моды-2017" праходзіць 16-17 мая. У ім прымаюць удзел дызайнеры, мадэлі, фатографы. У журы конкурсу - замежныя эксперты. Арганізатарамі мерапрыемства выступаюць Міністэрства адукацыі Беларусі, Нацыянальны цэнтр мастацкай творчасці дзяцей і моладзі.