Падзеі, факты, анонсы
Бязвізавы рэжым для турыстаў прапануецца ўвесці яшчэ на трох асабліва ахоўных тэрыторыях Беларусі
25 жніўня, Мінск /Кар. БЕЛТА/. Міністэрства прыродных рэсурсаў і аховы навакольнага асяроддзя прапануе ўвесці бязвізавы рэжым для турыстаў яшчэ на трох трансгранічных асабліва ахоўных прыродных тэрыторыях (ААПТ). Аб гэтым заявіў сёння міністр прыродных рэсурсаў і аховы навакольнага асяроддзя Андрэй Каўхута на сумесным пасяджэнні калегій Мінпрыроды і Мінспорту, тэмай якога стала развіццё экалагічнага турызму ў Беларусі, перадае карэспандэнт БЕЛТА.
"Важным з'яўляецца і развіццё трансгранічнага экалагічнага турызму. Ужо даволі даўно такія экалагічныя маршруты функцыянуюць у Белавежскай пушчы. Турыст, які падарожнічае па беларускай частцы пушчы, пры наяўнасці шэнгенскай візы можа прагуляцца і па польскай яе частцы. Акрамя таго, з 2015 года для турыстаў, якія наведваюць Белавежскую пушчу тэрмінам на тры дні, дзейнічае бязвізавы рэжым. Беручы пад увагу гэты станоўчы вопыт, неабходна прапрацаваць пытанне аб увядзенні бязвізавага рэжыму і для турыстаў, якія наведваюць трансгранічныя асабліва ахоўныя прыродныя тэрыторыі "Котра - Чапкеляй", "Рычы - Сіленэ" і "Браслаўскія азёры - Аўгшдаўгава", - адзначыў міністр.
Андрэй Каўхута таксама нагадаў аб стварэнні новага трансгранічнага маршруту "Па запаведных мясцінах Паазер'я", які пройдзе па тэрыторыі Беларусі і Расіі. "Плануецца, што ў гэты маршрут будуць уключаны тэрыторыі адразу некалькіх нацыянальных паркаў: "Браслаўскія азёры", "Нарачанскі", "Смаленскае Паазер'е", "Себежскі" і Бярэзінскага біясфернага запаведніка. У гэтым выпадку даўжыня шляху для турыстаў складзе 500 км", - падкрэсліў ён.
Сістэма ААПТ Беларусі на 1 ліпеня 2016 года ўключае 1275 тэрыторый, у тым ліку Бярэзінскі біясферны запаведнік, 4 нацыянальныя паркі ("Белавежская пушча", "Браслаўскія азёры", "Прыпяцкі", "Нарачанскі"), 98 заказнікаў рэспубліканскага значэння, 275 заказнікаў мясцовага значэння, 329 помнікаў прыроды рэспубліканскага значэння, 568 помнікаў прыроды мясцовага значэння.
версія для друку
зрабіць стартавай
дабавіць у выбранае