Падзеі, факты, анонсы

13 ліпеня, Брэст /Кар. БЕЛТА/. Камітэт міністраў Савета Еўропы прадоўжыў Белавежскай пушчы Еўрапейскі дыплом для ахоўных тэрыторый на 10 гадоў, паведамілі БЕЛТА ў нацыянальным парку.

Такое рашэнне камітэт прыняў на пасяджэнні 4 ліпеня на падставе справаздачы эксперта Міжнароднага саюза аховы прыроды. У красавіку бягучага года з ацэначнай місіяй нацыянальны парк наведаў эксперт Эрві Лецье. На падагульняючай прэс-канферэнцыі ён заявіў, што ў яго няма аб'ектыўных прычын прапаноўваць Савету Еўропы не прадаўжаць Еўрапейскі дыплом для Белавежскай пушчы. Падрабязную справаздачу аб місіі разгледзела група спецыялістаў па Еўрапейскім дыпломе, пасля чаго праект рэзалюцыі быў перададзены Камітэту міністраў.

"Улічваючы штогадовыя справаздачы, якія прадастаўляюцца Белавежскай пушчай, а таксама справаздачу эксперта і меркаванне групы спецыялістаў, Камітэт міністраў прыняў рашэнне прадоўжыць дыплом да 30 верасня 2028 года з адной абавязковай умовай. Пасля завяршэння дзеючага плана Белавежская пушча абавязана ў 2020 годзе прыняць новы доўгатэрміновы план кіравання нацыянальным паркам, які забяспечвае ўстойлівае кіраванне і ахову запаведнага лесу", - расказалі ў нацпарку.

У рэзалюцыі таксама дадзены рэкамендацыі па некаторых пытаннях кіравання нацыянальным паркам. У прыватнасці, размова ідзе аб пашырэнні запаведнай зоны да ўсёй гістарычнай часткі Белавежскай пушчы, акцэнтаванні аховы на стараўзроставых натуральных дрэвастоях, прадаўжэнні работ па аднаўленні гідралагічнага рэжыму і барацьбе з інвазівнымі відамі, супрацоўніцтве з адміністрацыяй польскай часткі пушчы. Выказаны і іншыя пажаданні, важныя для кіравання аб'ектам з Еўрапейскім дыпломам.

Еўрапейскі дыплом для ахоўных тэрыторый быў уручаны Нацыянальнаму парку "Белавежская пушча" ў 1997 годзе за поспехі ў справе аховы прыроды.