Падзеі, факты, анонсы

Беларусы выйгралі золата і серабро на ЧС па пажарна-выратавальным спорце

3 верасня, Мінск /Кар. БЕЛТА/. Беларусы выгралі золата і серабро на чэмпіянаце свету па пажарна-выратавальным спорце, паведамляе БЕЛТА са спасылкай на сайт МНС.

У казахстанскім горадзе Караганда 2 верасня стартавалі XVI чэмпіянат свету сярод мужчын і VII чэмпіянат свету сярод жанчын. "З самай раніцы спартсмены спаборнічалі ў пад'ёме па штурмавой лесвіцы на паверхі вучэбнай вежы, а ўвечары на стадыёне "Шахцёр" урачыста адкрыліся спаборніцтвы і прайшлі фінальныя забегі", - гаворыцца ў паведамленні.

У мерапрыемстве ўдзельнічалі міністр па надзвычайных сітуацыях Беларусі Вадзім Сіняўскі, яго калега з Казахстана Юрый Ільін, першы намеснік міністра Расіі па справах грамадзянскай абароны, надзвычайных сітуацый і ліквідацыі наступстваў стыхійных бедстваў Аляксандр Чупрыян і акім Карагандзінскай вобласці Жэніс Касымбек.

У жанчын у фінале спаборніцтваў выступіла беларуска Ірына Зіновіч: яна фінішавала з чацвёртым рэзультатам. У мужчынскім фінале выступалі адразу два прадстаўнікі зборнай Беларусі: Мікіта Уколаў і Антон Тарасевіч. У выніку Мікіта Уколаў з рэзультатам 12,89 сек. стаў чэмпіёнам свету, а Антон Тарасевіч - сярэбраным прызёрам. Таксама сталі вядомы рэзультаты ў агульнакамандным заліку: па выніках першага дня спаборніцтваў мужчынская зборная Беларусі стала першай, жаночая - другой.

Міністр па надзвычайных сітуацыях Беларусі павіншаваў каманды краіны з паспяховым выступленнем. "Тое, што вы зрабілі, дастойны рэзультат, я вас шчыра віншую. Але не трэба на гэтым спыняцца, бо наперадзе няпростая барацьба. Будзем балець за вас далей", - адзначыў Вадзім Сіняўскі.

версія для друку

зрабіць стартавай

дабавіць у выбранае