Падзеі, факты, анонсы

Беларускія паралімпійцы заваявалі 10 узнагарод на ЧС па лыжных відах спорту

Фота з архiва

24 студзеня, Мінск /Кар. БЕЛТА/. Беларускія паралімпійцы заваявалі 10 узнагарод на чэмпіянаце свету па лыжных відах спорту, які завяршыўся ў нарвежскім Лілехамеры, паведамляе карэспандэнт БЕЛТА.

У актыве беларусаў чатыры залатыя і па тры сярэбраныя і бронзавыя ўзнагароды ў спаборніцтвах па біятлоне і лыжных гонках. Двойчы на вышэйшую прыступку п'едэстала гонару падымаліся Святлана Саханенка, у якой таксама адзін сярэбраны медаль і бронзавы ў складзе змешанай эстафетнай каманды разам з Валянцінай Шыц, Аркадзем Шыкуцем і Мікітам Ладзесавым. Дзве ўзнагароды вышэйшай пробы паклаў у скарбоку беларускай зборнай Юрый Голуб. У яго актыве таксама адзін бронзавы медаль. Валянціна Шыц, акрамя эстафетнай бронзы, заваявала яшчэ два сярэбраныя медалі і адну бронзу ў асабістых гонках сусветнага першынства.

На гэтым чэмпіянаце планеты Беларусь прадстаўлялі больш за 20 спартсменаў, а ўсяго ў Лілехамеры выступалі амаль 800 атлетаў з усёй планеты. Гэта першы паралімпійскі чэмпіянат свету па снежных відах - лыжных гонках, горных лыжах, біятлоне і снаўбордзе, які праходзіў у адной краіне.

Цяпер група беларускіх біятланістаў і лыжнікаў адправілася ў шведскі Эстэрсунд, дзе адбудзецца заключны этап Кубка свету перад Паралімпіядай-2022. Зімовыя Паралімпійскія гульні пройдуць у Пекіне з 4 па 13 сакавіка.

версія для друку

зрабіць стартавай

дабавіць у выбранае