Падзеі, факты, анонсы

Беларускія медыкі адпрацоўваюць дзеянні на выпадак выяўлення пацыентаў з падазрэннем на каранавірус

Фота з архiва

3 лютага, Мінск /Кар. БЕЛТА/. Беларускія медыкі адпрацоўваюць дзеянні на выпадак выяўлення пацыентаў з падазрэннем на каранавірус, паведаміў журналістам міністр аховы здароўя Уладзімір Каранік, перадае карэспандэнт БЕЛТА.

"Павінна быць выразная лагістыка. Калі пацыент з прыкметамі віруснай інфекцыі звяртаецца ў прыёмны пакой або выклікае хуткую дапамогу і ў анамнезе - наведванне КНР, павінен быць праведзены ўвесь комплекс мерапрыемстваў па яго дастаўцы ў спецыялізаваную ўстанову, ізаляцыі, заборы біяматэрыялу, далейшай санапрацоўцы транспарту і месца, куды ён звярнуўся, ахоўнага адзення медперсаналу, які праводзіў транспарціроўку, - сказаў Уладзімір Каранік. - Наша задача - абараніць медперсанал і насельніцтва ад распаўсюджвання гэтай інфекцыі. Трэніроўкі павысяць верагоднасць таго, што ў выпадку выяўлення такога пацыента гэта не прывядзе да распаўсюджвання інфекцыі". Планавыя трэніроўкі, паводле слоў міністра, дадуць магчымасць выявіць усе шурпатасці і нестыкоўкі.

У Беларусі робяць усё магчымае, каб не дапусціць крытычнай сітуацыі, працуюць на папярэджанне. Праводзіцца прафілактычная работа па прадухіленні завозу ў краіну і распаўсюджвання віруса. "Зразумела, што мы жывём у глабальным свеце і не можам гарантаваць, што вірус не трапіць на нашу тэрыторыю. Але наша задача - яго лакалізаваць і не дапусціць распаўсюджвання ўнутры краіны", - адзначыў Уладзімір Каранік.

У прыватнасці, наладжаны кантроль на ўсіх пунктах пропуску - гэта датычыцца і авія-, і аўтамабільнага транспарту. У тых, хто прылятае прамым рэйсам з Кітая, а таксама пры наяўнасці небяспекі інкубацыйнага перыяду без прыкмет хваробы праводзіцца паглыбленае даследаванне для вызначэння магчымага нашэння віруса. Усе пасажыры з прыкметамі віруснай інфекцыі накіроўваюцца для даабследавання, устаноўкі дыягназу і аказання меддапамогі.

версія для друку

зрабіць стартавай

дабавіць у выбранае