Падзеі, факты, анонсы

Беларускія карціны розных гадоў увайшлі ў афішу Маскоўскага міжнароднага кінафестывалю

1 кастрычніка, Масква /Эдуард Півавар - БЕЛТА/. Карціны, створаныя беларускімі кінематаграфістамі ў розныя гады, уключаны ў пазаконкурсныя і спецыяльныя праграмы 42-га Маскоўскага міжнароднага кінафестывалю, які адкрываецца сёння, расказалі карэспандэнту БЕЛТА ў прэс-службе кінафоруму.

У праграму "Спецпаказы" ўвайшла драма беларуска-расійска-германскай вытворчасці "Урокі фарсі", створаная ў бягучым годзе. Дзеянне фільма адбываецца ў час Другой сусветнай вайны ў акупіраванай Еўропе. Значная частка кінастужкі здымалася ў Бабруйскай крэпасці, а ў масавых сцэнах прымалі ўдзел сотні мясцовых жыхароў. На маскоўскім кінафестывалі "Урокі фарсі" будуць прадстаўлены 7 кастрычніка.

Двойчы - 3 і 5 кастрычніка - на кінафоруме ў спецыяльнай праграме "Фільмы, якіх тут не было" пакажуць новы трылер з элементамі чорнай камедыі беларускага рэжысёра Уладзіміра Зінкевіча "Spice Boys". Гэта карціна заснавана на рэальных падзеях, якія адбыліся ў 2014 годзе ў Гомелі.

Дзве беларускія кінастужкі ўвайшлі ў спецпраграму "Вайна: сведкавыя паказанні". 2 кастрычніка пакажуць знакамітую "Альпійскую баладу", знятую ў 1965 годзе на "Беларусьфільме" Барысам Сцяпанавым паводле аднайменнай аповесці Васіля Быкава са Станіславам Любшыным і Любоўю Румянцавай у галоўных ролях. А 3 кастрычніка на фестывальным кінаэкране прадэманструюць фільм "У жніўні 44-га", створаны ў 2001 годзе народным артыстам Беларусі Міхаілам Пташуком.

Маскоўскі міжнародны кінафестываль - адзін з самых аўтарытэтных сусветных кінафорумаў. У бягучым годзе з-за пандэміі каранавіруса ён быў перанесены з вясны на восень. Не ўсе верылі, што ён у выніку адбудзецца, бо многія форумы ў гэтым годзе былі адменены або перайшлі ў анлайн. На маскоўскіх фестывальных пляцоўках будуць дзейнічаць асаблівыя санітарныя меры, а на ўсе паказы гледачы рэгіструюцца загадзя.

Усяго для ўдзелу ў форуме было адабрана больш за 180 кінастужак. У асноўны конкурс увайшлі 12 карцін, створаных кінематаграфістамі Расіі, Турцыі, Казахстана, Рэспублікі Карэя, Бразіліі, Румыніі, Ізраіля і Вялікабрытаніі. Кінафестываль завершыцца 8 кастрычніка.

версія для друку

зрабіць стартавай

дабавіць у выбранае