Падзеі, факты, анонсы

Беларускія гандбалісты перамаглі нарвежцаў у кваліфікацыі чэмпіянату Еўропы

6 студзеня, Мінск /Кар. БЕЛТА/. Гандбалісты зборнай Беларусі паспяхова правялі стартавы паядынак адборачнага турніру чэмпіянату Еўропы 2022 года, паведамляе карэспандэнт БЕЛТА.

У першым матчы кваліфікацыйнай групы 6 падапечныя Юрыя Шаўцова ўпэўнена перайгралі каманду Нарвегіі з лікам 33:25 (17:10). Да сярэдзіны першага тайма на пляцоўцы мінскага палаца спорту "Уручча" ішла ўпартая барацьба, а потым гаспадары цалкам захапілі ініцыятыву і пайшлі на перапынак з перавагай на сем мячоў. У другой палове сустрэчы беларусы прадаўжалі дамінаваць і ў выніку выйгралі з розніцай на восем мячоў. Лепшым снайперам у складзе пераможцаў стаў Уладзіслаў Кулеш, які сем разоў паразіў вароты гасцей. У пятніцу, 8 студзеня, у нарвежскім горадзе Бекестуа адбудзецца сустрэча ў адказ гэтых сапернікаў. Да гэтага нарвежская дружына ў сваім стартавым паядынку разграміла ў Пескары каманду Італіі з лікам 39:24. У гэтым квартэце таксама выступіць зборная Латвіі.

Пасля гульняў з нарвежцамі беларускія гандбалісты адправяцца ў Егіпет на чэмпіянат свету, які пройдзе з 14 па 31 студзеня. На першым этапе планетарнага форуму зборная Беларусі згуляе ў папярэдняй групе Н з камандамі Расіі (14 студзеня), Рэспублікі Карэя (16 студзеня) і Славеніі (18 студзеня). Барацьбу за ўзнагароды сусветнага першынства прадоўжаць па тры лепшыя каманды з 8 квартэтаў.

версія для друку

зрабіць стартавай

дабавіць у выбранае