Падзеі, факты, анонсы

Беларускія дзіцячыя кардыяхірургі правялі пяць вельмі складаных аперацый у пацыентаў з рэдкімі паталогіямі

Фота з архiва

12 ліпеня, Мінск /Кар. БЕЛТА/. Беларускія дзіцячыя кардыяхірургі правялі пяць вельмі складаных аперацый у пацыентаў з рэдкімі паталогіямі, паведаміў журналістам дырэктар РНПЦ дзіцячай хірургіі Канстанцін Драздоўскі, перадае карэспандэнт БЕЛТА.

Пяць пацыентаў з вельмі складанымі прыроджанымі парокамі сэрца і сасудаў, у тым ліку з анамаліяй Эбштэйна, прыбылі ў цэнтр з усіх рэгіёнаў Беларусі. Аперацыі прайшлі пры непасрэдным удзеле аднаго з самых вядомых і вопытных кардыяхірургаў свету прафесара Афксендыяса Калангаса, прэзідэнта Фонду Калангаса (Швейцарыя).

"Прыезд прафесара другі раз да нас быў запланаваны, таму што ў яго вельмі вялікі вопыт у лячэнні анамаліі Эбштэйна. Мінулы раз перад ад'ездам ён прааперыраваў маленькае дзіця, якое адчувае сябе нядрэнна. Мы падрыхтавалі дастаткова рэдкіх складаных пацыентаў, у тым ліку з анамаліяй Эбштэйна, і чакалі яго другога прыезду. На жаль, з-за каранціну гэты прыезд адбыўся толькі праз паўтара года. Але вопыт прафесара пры лячэнні рэдкіх паталогій складана пераацаніць, і мы запрашаем яго да нас на самыя рэдкія, самыя складаныя выпадкі. Ён, на шчасце, пагаджаецца. І на гэты раз прыехаў нам дапамагчы", - сказаў Канстанцін Драздоўскі.

Адна з пацыентак з анамаліяй Эбштэйна, даволі рэдкай і цяжкай паталогіяй, назіраецца ў цэнтры практычна з нараджэння. "Але ў гэтым выпадку была магчымасць даць ёй падрасці і падысці да аперацыі ў аптымальным стане, гэта значыць у 15 гадоў, калі тканка, створкі клапана найбольш трывалыя і вынік аперацыі найбольш прадказальны", - растлумачыў дырэктар цэнтра. Аперацыя была выканана па даволі ўнікальнай тэхналогіі. Цяпер клапан адноўлены поўнасцю. Калі да аперацыі ў падлетка была недастатковасць трэцяй ступені, але пасля ўмяшання гэтай недастатковасці няма, клапан функцыянуе добра.

Сярод прааперыраваных пацыентаў быў і зусім унікальны выпадак. "Акрамя анамаліі Эбштэйна, пацыентаў з якой мы аперыруем у гэты прыезд і якая сама па сабе вельмі рэдкая паталогія і не ўсе цэнтры Еўропы і ЗША аперыруюць такіх пацыентаў, мы сутыкнуліся з адным вельмі рэдкім выпадкам - таракаабдамінальнай анеўрызмай брушной аорты. Мы назіраем за дзіцем ужо чатыры гады, цяпер яму 11 гадоў. Паўтара года таму мы яго кансультавалі з прафесарам, планавалі аперыраваць і, нарэшце, учора гэту аперацыю зрабілі", - сказаў Канстанцін Драздоўскі.

Паводле яго слоў, аперацыя была вельмі цяжкая, тэхнічна вельмі складаная, з магчымымі ўскладненнямі. Аднак урачам удалося выканаць яе паспяхова, дзіця папраўляецца. Дырэктар цэнтра заўважыў, што прафесар Калангас ніколі не бачыў такой паталогіі ў настолькі раннім узросце. Больш таго, апісанні такіх выпадкаў не сустракаліся і ў сусветнай літаратуры.

Хлопчык трапіў у поле зроку дзіцячых кардыяхірургаў чатыры гады таму пасля перанесенай інфекцыі. Таракаабдамінальная анеўрызма брушнай аорты часцей сустракаецца ў дарослых пацыентаў і, як правіла, узнікае пасля інфекцыйнага захворвання: інфекцыя пашкоджвае сценкі аорты, яна разрываецца і фарміруецца анеўрызма.

"Пасля таго як мы паспрабавалі знайсці дапамогу за мяжой (звярталіся ў вялікую колькасць цэнтраў Еўропы, ЗША), на жаль, адусюль прыйшоў адмоўны адказ, ніхто не адважыўся ўзяцца за аперацыю ў такога дзіцяці. Таму мы вырашылі правесці яе самі пад кіраўніцтвам прафесара Калангаса. Але гэта паталогія як бомба - яна можа выбухнуць у любы момант. Аб гэтым мы размаўлялі з бацькамі, прафесар тлумачыў ім усе рызыкі. Прынялі рашэнне праводзіць аперацыйнае ўмяшанне, і, дзякуй богу, яно прайшло добра", - адзначыў Канстанцін Драздоўскі.

Ён дадаў, што аперацыя звязана з высокай рызыкай пасляаперацыйных неўралагічных ускладненняў. "Вельмі важна захаваць абсалютна ўсе артэрыі, якія адыходзяць ад гэтага месца, каб даць магчымасць пацыенту, у нашым выпадку дзіцяці, жыць паўнацэнным жыццём, - сказаў дырэктар цэнтра. - Ранні вынік аперацыі вельмі добры, мы бачым добрую функцыю біялагічнага пратэза, якім замясцілі частку аорты ў дзіцяці. У яго добры ціск на ніжніх канечнасцях, а аб неўралогіі будзем меркаваць пазней".

Афксендыяс Калангас - загадчык аддзялення дзіцячай і прыроджанай сардэчна-сасудзістай хірургіі ў бальніцы Мітэра ў Афінах і прафесар дзіцячай сардэчна-сасудзістай хірургіі ва ўніверсітэцкай бальніцы Коч у Стамбуле. Ён таксама вынайшаў методыку біяраскладальнай анулапластыкі, якая выкарыстоўваецца для аднаўлення мітральнага і трыкуспідальнага клапанаў у дзяцей.

версія для друку

зрабіць стартавай

дабавіць у выбранае