Падзеі, факты, анонсы

11 мая, Мінск /Кар. БЕЛТА/. Беларуска Марыя Кулінковіч стала бронзавым прызёрам чэмпіянату Еўропы па каратэ ў вагавой катэгорыі да 50 кг, паведаміў карэспандэнту БЕЛТА генеральны сакратар Беларускай федэрацыі каратэ Дзмітрый Бурынскі.

На старце турніру ў індывідуальным кумітэ ў французскім Манпелье Марыя Кулінковіч дабілася перамогі над Таняй Матас з Партугаліі - 2:0, але ўжо ў наступным раўндзе ўступіла аднаму з фаварытаў чэмпіянату ў гэтай вагавой катэгорыі Серап Озчэлік з Турцыі - 0:7. Свой шанц паспаборнічаць за ўзнагароду беларуска атрымала пасля таго, як Озчэлік дайшла да фіналу, дзе ўступіла францужанцы Аляксандры Рэкіі. У суцяшальным турніры Марыя Кулінковіч перамагла Аляксандру Поп з Румыніі - 3:0 і Бэціну Планк з Аўстрыі - 1:0, якая займае ў сусветным рэйтынгу 3-е месца. Дзякуючы бронзавай узнагародзе кантынентальнага форуму Кулінковіч змагла ўвайсці ў дзясятку лепшых атлетаў у рэйтынгу да 50 кг і займае ў спісе 9-е месца.

"Гэта сур'ёзны поспех для беларускага каратэ. У ходзе сезона Марыя выступала не так удала, аднак, як запэўнілі ў трэнерскім штабе зборнай, пік формы спартсменкі прыпаў менавіта на чэмпіянат Еўропы", - адзначыў Дзмітрый Бурынскі. Марыя Кулінковіч была таксама ўдзельніцай першых Еўрапейскіх гульняў у Баку.

У 51-м чэмпіянаце Еўропы па каратэ, які завяршыўся ў Манпелье, прынялі ўдзел спартсмены з 46 краін.