Падзеі, факты, анонсы

Лідар зборнай Беларусі Меліціна Станюта з рэзультатам 18,500 бала стала сярэбраным прызёрам у практыкаваннях з мячом. Першае месца заняла ўкраінская гімнастка Ганна Рызатдзінава (18,650). У практыкаваннях з абручом Станюта спынілася за крок ад п'едэстала, заняўшы 4-е месца, у практыкаваннях са стужкай была 5-й. У мнагабор'і ў яе шостая пазіцыя - 72,300 бала.

У групавых спаборніцтвах беларуская каманда ў складзе Марыі Кадобінай, Ганны Дудзянковай, Валерыі Пішчэлінай, Марыі Кацяк, Ксеніі Чалдышкінай і Арыны Цыцылінай выйграла сярэбраную ўзнагароду ў практыкаваннях з булавамі і абручамі, а ў мнагабор'і стала шостай.

На сусветным першынстве па акрабатычнай гімнастыцы ў кітайскім горадзе Пуцянь у актыве беларусаў два медалі. Маргарыта Барташэвіч і Вікторыя Міхновіч сталі сярэбранымі прызёрамі ў спаборніцтвах жаночых пар (27,575 бала), прапусціўшы наперад толькі расійскі дуэт Дар'я Гур'ева / Дар'я Калініна (28,760). У турніры жаночых груп беларускі Карына Сандовіч, Вераніка Набокіна і Кацярына Барысевіч заваявалі бронзу (28,220). Першай была каманда Расіі (28,880), другое месца ў зборнай Кітая (28,460). У спаборніцтвах змешаных пар беларускі тандэм Артур Белякоў / Вольга Мельнік з рэзультатам 27,430 бала заняў 4-ю падагульняючую пазіцыю. Чэмпіёнамі ў гэтым відзе праграмы сталі расіяне, на другой пазіцыі амерыканскі дуэт, трэцяе месца ў Вялікабрытаніі.