Падзеі, факты, анонсы
Беларускі велагоншчык Браніслаў Самойлаў выйграў камандную гонку ў Італіі
24 сакавіка, Мінск /Кар. БЕЛТА/. Беларускі велагоншчык Браніслаў Самойлаў стаў пераможцам каманднай гонкі ў складзе польскай веладружыны CCC Sprandi Polkowice на першым этапе шматдзённай велагонкі Settimana Internazionale Coppi e Bartali ў Італіі, паведамілі карэспандэнту БЕЛТА ў велаклубе "Мінск".
Каманды ў гэтай гонцы былі падзелены на квартэты. Усяго на старт выйшлі 50 чацвёрак. Польская Sprandi, у якую быў уключаны і Браніслаў Самойлаў, прадэманстравала лепшы час на дыстанцыі 13,3 км (14 мін. і 57 сек.), апярэдзіўшы на дзве секунды каманду Team Sky. Французы з Direct Energie ўступілі 13 секунд і занялі трэцяе месца.
Удзел у шматдзённым спаборніцтве прымае таксама кантынентальная каманда велаклуба "Мінск". Першы мінскі квартэт (Аляксандр Галаваш, Сяргей Папок, Яўген Собаль, Эдуард Варганаў) паказаў 24-ы рэзультат - 15 мін. 50 сек., другая чацвёрка (Алег Агіевіч, Станіслаў Бажкоў, Канстанцін Клімянкоў, Раман Раманаў) праехала дыстанцыю з 26-м часам - 15 мін. 52 сек.
Яшчэ адзін беларус Ілья Кашавой (каманда Wilier Triestina) заняў са сваёй чацвёркай 37-е месца.
Пасля першага этапу гонкі, што складаўся з двух паўэтапаў (камандная паасобная гонка прайшла ў другой палавіне дня, а раніцай удзельнікі праехалі групавую гонку 98 км), лепшым з беларусаў у генеральнай класіфікацыі з'яўляецца гоншчык "Мінска" Станіслаў Бажкоў, які займае 50-е месца. Яго адставанне ад лідзіруючага француза Ліліяна Кальмжана з Direct Energie складае 1 мін 05 сек.
Наперадзе ў гоншчыкаў яшчэ тры этапы. Велагонка ў Італіі завершыцца 26 сакавіка.
версія для друку
зрабіць стартавай
дабавіць у выбранае