Падзеі, факты, анонсы

Беларускі тэнісіст Ягор Герасімаў прабіўся ў другі раўнд Australian Open

Ягор Герасімаў. Фота AFP

8 лютага, Мінск /Кар. БЕЛТА/. На кортах "Мельбурн Парка" стартаваў першы ў сезоне тэнісны турнір серыі "Вялікага шлема" - адкрыты чэмпіянат Аўстраліі, паведамляе карэспандэнт БЕЛТА.

Першым з пяці прадстаўнікоў Беларусі на корт "Мельбурн Парка" выйшаў Ягор Герасімаў (78-ы нумар сусветнага рэйтынгу), які ў 1/64 фіналу перамог у чатырохсэтавым паядынку француза Бенуа Пэра (28) - 6:2, 2:6, 7:6 (7:5), 7:5. Сустрэча доўжылася 3 гадзіны 11 мінут. Наступным сапернікам беларуса будзе расійскі тэнісіст Аслан Карацаў (113), які сёння выйграў у італьянца Джанлукі Магера - 6:3, 6:3, 6:4. Заўтра яшчэ адзін беларус Ілья Івашка (110) сустрэнецца з расіянінам Раманам Сафіуліным (182).

Таксама сёння ў першым раўндзе жаночага адзіночнага разраду сёмая ракетка планеты Арына Сабаленка сустрэнецца са славацкай тэнісісткай Вікторыяй Кужмавай, якая займае 98-е месца ў сусветным рэйтынгу. Заўтра саперніцай двухразовай пераможцы Australian Open экс-першай ракеткі свету Вікторыі Азаранка (13) будзе амерыканка Джэсіка Пегула (64). Аляксандра Сасновіч (90) згуляе з эстонкай Анет Кантавейт (23).

Матчы Australian Open - 2021 пройдуць на кортах "Мельбурн Парка" з 8 па 21 лютага. Агульны прызавы фонд гэтага аўстралійскага першынства складзе $55,2 млн. Пераможцы ў мужчынскім і жаночым адзіночным разрадзе заробяць па $2,1 млн. У мінулым годзе пераможцай жаночага турніру аўстралійскага першынства ўпершыню стала Сафія Кенін з ЗША, а ў мужчын свой восьмы чэмпіёнскі тытул заваяваў серб Новак Джокавіч.

версія для друку

зрабіць стартавай

дабавіць у выбранае