Падзеі, факты, анонсы

Беларускі школьнік адправіўся на Паўночны полюс у складзе міжнароднай экспедыцыі "Ледакол ведаў"

5 жніўня, Мінск /Кар. БЕЛТА/. Беларускі школьнік адправіўся на Паўночны полюс у складзе міжнароднай экспедыцыі "Ледакол ведаў", паведамілі БЕЛТА ў прэс-службе краінавага офіса дзяржкарпарацыі "Расатам" у Беларусі.

У міжнародным адборы на ўдзел у рэйсе спаборнічалі каля 5 тыс. школьнікаў з 22 краін: Арменіі, Бангладэш, Беларусі, Балівіі, Бразіліі, Венгрыі, В'етнама, Егіпта, Індыі, Інданезіі, Казахстана, Кітая, Кыргызстана, Манголіі, М'янмы, Намібіі, Руанды, Сербіі, Танзаніі, Турцыі, Узбекістана і ПАР.

Школьнік з Беларусі стане ўдзельнікам міжнароднай экспедыцыі да Паўночнага полюса на атамным ледаколе

"Мяне заўсёды па-сапраўднаму захапляла ўсё, што звязана з адкрыццямі, даследаваннямі і тым, як навука дапамагае чалавеку пашыраць межы магчымага. Для мяне вялікі гонар прадстаўляць Беларусь у такім праекце. Я вельмі чакаю магчымасці ўбачыць Арктыку на ўласныя вочы, паразмаўляць з экспертамі і моладдзю з розных краін, задаць дзясяткі пытанняў і адкрыць для сябе новыя арыенціры", - адзначыў удзельнік праекта ад Беларусі, навучэнец гімназіі №1 Віцебска імя Ж.І.Алфёрава Ціхан Карняенка.

Экспедыцыя адправілася з Мурманска на атамным ледаколе "50 гадоў Перамогі" і прадоўжыцца 10 дзён. Пасля выхаду з порта судна пройдзе праз Баранцава мора ў высокія шыроты Арктыкі, пройдзе ў раёне архіпелага Зямля Франца-Іосіфа, дасягне геаграфічнага Паўночнага полюса і затым вернецца ў Мурманск. У час рэйса ўдзельнікі пазнаёмяцца з прыродай Крайняй Поўначы, убачаць работу атамнага ледакола і даведаюцца больш пра ролю атамных тэхналогій у развіцці арктычнага суднаходства. На Паўночны полюс школьнікі даставяць сцягі сваіх краін.

З першага дня на борце стартуе насычаная адукацыйная праграма. Удзельнікаў чакаюць лекцыі, майстар-класы, дыскусіі, навуковыя эксперыменты, кар'ерныя кансультацыі, творчыя актыўнасці, а таксама сімвалічныя падзеі - ад паштовак з самай паўночнай пошты да "кругасветнага падарожжа" ў пункце перасячэння ўсіх мерыдыянаў. На борце атамнага ледакола з удзельнікамі экспедыцыі будуць працаваць вядучыя міжнародныя эксперты.

Спецыяльнымі гасцямі рэйса стануць папулярныя артысты і блогеры, а таксама вядомы расійскі пісьменнік-фантаст Сяргей Лук'яненка. У час арктычнай экспедыцыі ён правядзе для ўдзельнікаў рэйса творчую лабараторыю: аўтар задасць інтрыгуючы пачатак навукова-фантастычнага апавядання, а школьнікі прапануюць свае версіі фіналу. Па выніках экспедыцыі сумесны твор у поўным аб'ёме будзе афіцыйна апублікаваны.

"Арктыка - гэта месца сілы, дзе нараджаюцца і ўвасабляюцца самыя амбіцыйныя ідэі. Сюды імкнуцца смелыя і актыўныя людзі, гатовыя будаваць лепшую будучыню. "Ледакол ведаў" вязе на Паўночны полюс менавіта такіх хлопцаў і дзяўчат. На борце школьнікі азнаёмяцца з тэхналогіямі, якія яны не ўбачаць больш нідзе. Мы хочам аб'яднаць энергію лепшых маладых талентаў дзеля развіцця навукі і захавання планеты. Гэта энергія і ёсць галоўны драйвер прагрэсу", -  адзначыў генеральны дырэктар дзяржкарпарацыі "Расатам" Аляксей Ліхачоў.

Навукова-асветны праект "Ледакол ведаў" арганізаваны пры падтрымцы дзяржкарпарацыі "Расатам". Ён накіраваны на папулярызацыю прыродазнаўча-навуковых дысцыплін і тэхналогій атамнай галіны, пошук і падтрымку таленавітых і адораных дзяцей, развіццё іх здольнасцей і прафарыентацыю. У праекце прымаюць удзел школьнікі і студэнты праграм сярэдняй спецыяльнай адукацыі 14-16 гадоў з усяго свету, лепшыя з іх адправіліся ў экспедыцыю да Паўночнага полюса.

Міжнародны адбор стартаваў 5 мая і прайшоў у тры этапы. На першым этапе ўдзельнікі адказвалі на пытанні навуковай віктарыны, дзе маглі праверыць свае веды ў

галіне прыродазнаўчых навук, прарыўных тэхналогій, атамнай энергетыкі і заваявання Арктыкі. Другі этап уключаў серыю вэбінараў ад экспертаў атамнай галіны. Удзельнікам расказвалі аб перспектыўных рашэннях "Расатама", у тым ліку аб тэхналогіях, якія прымяняюцца для бяспечнага і ўстойлівага развіцця арктычнага суднаходства, а таксама аб ролі атамнай энергетыкі ў будучыні сусветнай эканомікі і навукі. Па суме балаў за абодва этапы ў кожнай краіне былі адабраны 10 фіналістаў, якія прайшлі ў заключны этап і прадставілі творчыя работы на тэму "Як атамныя тэхналогіі мяняюць свет сёння". У фінале ўдзельнікам было важна не толькі прадэманстраваць веданне тэмы, але і паказаць уменне думаць нестандартна, пераканаўча выбудоўваць аргументацыю і цікава падаваць матэрыял. Работы фіналістаў ацэньвала міжнароднае журы, у склад якога ўвайшлі прадстаўнікі атамнай галіны, навукі, адукацыі, арктычнага парадку дня і навуковых камунікацый. Рэкордная колькасць заявак на ўдзел паступіла з Казахстана (945 удзельнікаў), Кіргізіі (827 удзельнікаў) і Беларусі (464 удзельнікі). Таксама лідарамі па актыўнасці сёлета сталі Бангладэш і М'янма.

За шэсць сезонаў праекта "Ледакол ведаў" удзельнікамі арктычных экспедыцый да Паўночнага полюса сталі больш 400 таленавітых школьнікаў з розных краін свету.