Падзеі, факты, анонсы
Беларускі навучэнец атрымаў залаты медаль на міжнароднай алімпіядзе па геаграфіі
Фота з архiва
16 жніўня, Мінск /Кар. БЕЛТА/. Навучэнец брэсцкай гімназіі нумар 1 Дзяніс Рабчук удастоены залатога медаля на XVII Міжнароднай алімпіядзе па геаграфіі (iGeo-2021). У бягучым годзе спаборніцтва праходзіла з 10 па 16 жніўня ў анлайн-фармаце, паведамілі БЕЛТА ў БДУ.
Гэта ўжо другое золата на рахунку беларускіх школьнікаў у гісторыі ўдзелу нацыянальнай зборнай на такіх спаборніцтвах.
Таксама нашу краіну на алімпіядзе прадставілі Ілья Туча (гімназія нумар 1 Баранавіч), Леанід Палхоўскі (Магілёўскі дзяржаўны абласны ліцэй нумар 3) і Дзмітрый Міхасько (гімназія нумар 2 Віцебска). Удзел юных географаў у міжнародным спаборніцтве стаў магчымы дзякуючы іх паспяховаму выступленню на Еўрапейскай міжнароднай алімпіядзе па геаграфіі. Тут школьнікі заваявалі два сярэбраныя і шэсць бронзавых медалёў.
Іх кіраўнікамі выступілі дэкан факультэта геаграфіі і геаінфарматыкі БДУ Дзмітрый Курловіч і дацэнт кафедры эканамічнай і сацыяльнай геаграфіі факультэта Ілья Запрудскі.
Удзельнікам прапаноўвалася вырашыць мальтымедыйны тэст, тэарэтычныя заданні і прадэманстраваць навыкі аналітычнай работы з палявымі геаграфічнымі і геалагічнымі матэрыяламі. Усе заданні для школьнікаў былі прадастаўлены і выконваліся на англійскай мове.
Усяго ў iGeo-2021 прынялі ўдзел 200 школьнікаў з 46 краін. Краінай-арганізатарам алімпіяды ў бягучым годзе выступіла Турцыя. Наступнай у 2022 годзе стане Францыя.
Міжнародная геаграфічная алімпіяда праводзіцца з 1996 года пад патранажам Міжнароднага геаграфічнага саюза з мэтай павышэння цікавасці моладзі да геаграфічных і экалагічных даследаванняў. Упершыню адбылася ў Гаазе (Нідэрланды). Удзельнікамі спаборніцтва з'яўляюцца юныя географы ва ўзросце ад 16 да 19 гадоў. Да 2012 года алімпіяда арганізоўвалася адзін раз у два гады, а з 2013-га - штогод. У мінулым годзе з-за эпідсітуацыі iGeo не праводзілася. За перыяд правядзення міжнароднага спаборніцтва геаграфія краін-удзельніц пашырылася ад 5 да 46 краін.
версія для друку
зрабіць стартавай
дабавіць у выбранае