Падзеі, факты, анонсы

9 верасня, Мінск /Кар. БЕЛТА/. Дзве прэм'еры падрыхтуе ў 2016 годзе Беларускі дзяржаўны акадэмічны музычны тэатр, паведамілі карэспандэнту БЕЛТА ў тэатры.

У тэатры працуюць над балетам Пятра Чайкоўскага "Лебядзінае возера" і мюзіклам Кіма Брэйтбурга "Джэйн Эйр". Рэпетыцыі былі пачаты ў папярэднім сезоне. Да канца года Тэатр музычнай камедыі правядзе абменныя гастролі з Рускім драматычным тэатрам Літвы (Вільнюс) і Смаленскім дзяржаўным драматычным тэатрам імя А.С. Грыбаедава (Расія).

Акрамя таго, ужо сёння юныя гледачы могуць лічыць сябе запрошанымі на "Навагодні баль у Папялушкі" ў тэатр, а публіку ўсіх узростаў тут чакаюць на "Новы год у стылі Галівуд".

Адкрыццё ж 47-га тэатральнага сезона адбудзецца 11 верасня. На сцэне - спектакль-лаўрэат Нацыянальнай тэатральнай прэміі - мюзікл Уладзіміра Кандрусевіча "Соф'я Гальшанская", паказ якога прымеркаваны да юбілею мастацкага кіраўніка тэатра - заслужанага работніка культуры Беларусі Адама Мурзіча.

Па традыцыі адкрыццё сезона становіцца парадам прэм'ер і тэатральных хітоў на ўсе часы. Усе наступныя дні з 12 па 16 верасня гледачоў чакаюць у тэатры музычнай камедыі на паказы мюзікла Фрэдэрыка Лоу "Мая цудоўная лэдзі", аперэты Пала Абрахама "Баль у "Савоі", мюзікла Максіма Дунаеўскага "Мэры Попінс", балета Гельсят Шайдулавай "Клеапатра", музычнай камедыі Барыса Аляксандрава "Вяселле ў Малінаўцы".