2 снежня, Мінск /Кар. БЕЛТА/. Беларус Уладзімір Чапелін стаў бронзавым прызёрам індывідуальнай гонкі на 20 км на першым этапе Кубка свету па біятлоне ў шведскім Эстэрсундзе, паведамляе карэспандэнт БЕЛТА.
Як і ў час жаночай гонкі на 15 км, на рэзультаты біятланістаў у многім паўплываў парывісты вецер. Аднак фаварытам мінулага сезона гэта не перашкодзіла паказаць высокі рэзультат. Першае месца заняў уладальнік Вялікага хрустальнага глобуса мінулага сезона Мартэн Фуркад - 51 мін 33,8 сек (0+2+0+0). Другім фінішаваў нарвежац Ёханес Бо - +29,5 сек (0+0+0+2).
Трэці рэзультат, нечакана для многіх спецыялістаў, паказаў беларус Уладзімір Чапелін. Магілёўскі біятланіст пастараўся без памылак прайсці 20-кіламетровую дыстанцыю і дапусціў толькі адзін промах на чатырох агнявых рубяжах - +1 мін 24,3 сек (1+0+0+0). Уладзімір Чапелін упершыню ў кар'еры ў індывідуальнай гонцы ўзняўся на п'едэстал гонару Кубка свету.
Як паведамлялася, 1 снежня беларуска Дар'я Юркевіч таксама заваявала бронзавую ўзнагароду ў Эстэрсундзе ў гонцы на 15 км з чатырма агнявымі рубяжамі.
Першы Этап Кубка свету прадоўжыцца ў Швецыі 3 снежня спрынтарскімі гонкамі на 7,5 км у жанчын і 10 км у мужчын.