Падзеі, факты, анонсы
БДУ палепшыў вынікі ў прадметным рэйтынгу QS на 100 пазіцый
22 красавіка, Мінск /Кар. БЕЛТА/. БДУ на 100 пазіцый палепшыў вынікі і застаўся адзіным прадстаўніком Беларусі ў прадметным рэйтынгу QS. Абноўленыя спісы Quacquarelli Symonds (QS) апублікавалі напярэдадні па 46 навуковых напрамках і 5 галінах ведаў. Аб гэтым БЕЛТА паведамілі ў прэс-службе ВНУ.
БДУ падняўся на 100 месцаў у прадметным рэйтынгу "Фізіка і астраномія" і ўвайшоў у групу 351-400. Усяго ў гэтай катэгорыі заяўлена 1562 універсітэты, якія выканалі патрабаванні па колькасці публікацый. Значны рост БДУ абумоўлены паляпшэннем рэпутацыі сярод работадаўцаў і павелічэннем колькасці цытаванняў навуковых публікацый.
Узначаліў прадметны рэйтынг "Фізіка і астраномія" Масачусецкі інстытут тэхналогій (ЗША). З краін-суседзяў у гэтай катэгорыі прадстаўлены 17 расійскіх універсітэтаў, сярод якіх МДУ імя М.В. Ламаносава (34), Маскоўскі фізіка-тэхнічны інстытут (41), Нацыянальны даследчы ядзерны ўніверсітэт "МІФІ" (73), восем польскіх ВНУ на чале з Варшаўскім універсітэтам (151-200), Вільнюскі ўніверсітэт (301-350), Нацыянальны Кіеўскі ўніверсітэт імя Т. Шаўчэнкі (401-450), Харкаўскі нацыянальны ўніверсітэт імя В.Н. Каразіна (551-600) і Універсітэт Тарту (451-500).
Таксама ўпершыню БДУ ранжыраваны ў прадметным рэйтынгу "Прыродазнаўчыя навукі". Тут акрамя ацэнкі рэпутацыі ўстановы, сярэдняй колькасці цытаванняў навуковых публікацый і індэкса Хірша ўлічваецца ступень інтэрнацыянальнасці даследаванняў. Беларуская ВНУ ў гэтай галіне ведаў адзначана на 384-м месцы з 1503 адабраных прэтэндэнтаў.
БДУ адзіны з універсітэтаў Беларусі прысутнічае ў прадметных рэйтынгах QS з 2017 года. Яны распрацоўваюцца для дапамогі студэнтам у выбары ўніверсітэтаў па напрамках, якія цікавяць. Акрамя QS, БДУ прадстаўлены ў прадметных рэйтынгах іншых агенцтваў: Шанхайскі рэйтынг па "Фізічных навуках" з пазіцыяй 201+, THE па "Інжынерных навуках і тэхналогіях" (801+) і "Фізічных навуках" (1001+), U.S. News па фізіцы (180) і па хіміі (676), URAP па фізічных навуках (769).
версія для друку
зрабіць стартавай
дабавіць у выбранае