Падзеі, факты, анонсы
Акцыя "Пшуткі ля кармушкі" пройдзе ў Беларусі 16-17 студзеня
Фота з архiва
11 студзеня, Мінск /Кар. БЕЛТА/. Акцыя "Пшуткі ля кармушкі" пройдзе ў Беларусі 16-17 студзеня, паведамілі БЕЛТА ў грамадскай арганізацыі "Ахова птушак Бацькаўшчыны" (АПБ).
Акцыя нагадвае аб тым, як важна падкормліваць птушак у холад. Яна таксама дае магчымасць прасачыць змяненні ў папуляцыях вераб'іных і своечасова на іх адрэагаваць. Такія падлікі праводзяцца ў многіх краінах. У іх можна ўдзельнічаць усёй сям'ёй разам з дзецьмі.
Для ўдзелу ў акцыі неабходна 16 або 17 студзеня падлічыць віды і колькасць птушак на сваёй кармушцы на працягу гадзіны і прыслаць даныя ў АПБ. Птушак можна падлічваць і 3-4 гадзіны, але тады трэба даць 3-4 справаздачы (па адной у гадзіну). Гэта можна будзе зрабіць, запоўніўшы спецыяльную форму на сайце, акрамя таго, можна размясціць паведамленне ў сацыяльных сетках. Каб было лягчэй устанавіць від птушкі, АПБ размясціла на сваім сайце міні-вызначальнік.
Сярод удзельнікаў, якія прышлюць вынікі сваіх назіранняў праз спецыяльную форму, АПБ разыграе 10 значкоў з птушкамі. Шанц выйграць сувеніры ёсць і ў тых, хто размесціць свае фота і відэа ў сацсетках з хэштэгам #птушкілякармушкі або загрузіць іх у спецыяльны альбом у "УКантакце".
У грамадскай арганізацыі растлумачылі, што лепшы корм для прадстаўнікоў сямейства вераб'іных - несалёныя няпрэжаныя семечкі сланечніка. Сініцы і дзятлы з задавальненнем ядуць несалёнае свежае сала: яго кавалачкі можна нанізаць на цвікі па краях кармушкі, прывязаць да галінкі або падвесіць у сетцы. Вераб'і, зелянушкі, чыжы і попаўзні любяць ласавацца несалёным і няпрэжаным арахісам. Ні ў якім разе нельга класці ў кармушку хлеб, батон і іншую ежу са стала чалавека.
Звычайна на кармушкі ў гарадах залятаюць вялікія сініцы, палявыя і дамавыя вераб'і. Кожны год яны ўваходзяць у топ-3 відаў, заўважаных у час акцыі. Прылятаюць і сініцы іншых відаў, зелянушкі, дубаносы, дзятлы, часам сустракаюцца пералётныя птушкі.
версія для друку
зрабіць стартавай
дабавіць у выбранае