Падзеі, факты, анонсы

1 чэрвеня, Мінск /Кар. БЕЛТА/. Адкрыццё абноўленага будынка Беларускага рэспубліканскага тэатра юнага гледача - добры прыклад клопату дзяржавы аб моладзі. Такое меркаванне выказала сёння на адкрыцці будынка намеснік прэм'ер-міністра Наталля Качанава, перадае карэспандэнт БЕЛТА.

"Наша сустрэча праходзіць у новым будынку Беларускага рэспубліканскага тэатра юнага гледача. Гэта добры памятны падарунак да свята і сведчанне таго, што ў нашай краіне ёсць усе ўмовы для таго, каб дзеці і моладзь раслі здаровымі, шчаслівымі, адукаванымі. У гэты год, аб'яўлены па ініцыятыве Прэзідэнта Беларусі Годам моладзі, ваша пакаленне можа рэалізаваць свае ініцыятывы, заявіць аб сабе канкрэтнымі справамі, якія прыносяць карысць краіне", - сказала Наталля Качанава.

Віцэ-прэм'ер пакінула запіс у кнізе ганаровых гасцей ТЮГа.

Наталля Качанава таксама павіншавала маладых людзей, якія сёння сталі героямі дня як стыпендыяты спецыяльнага фонду Прэзідэнта Беларусі па сацыяльнай падтрымцы таленавітай моладзі.

Беларускі рэспубліканскі тэатр юнага гледача пасля пяці гадоў рэканструкцыі раскрыў свае дзверы 1 чэрвеня, у Дзень абароны дзяцей. Прэм'ерны спектакль, які змогуць убачыць госці тэатра 2, 3 і 4 чэрвеня, - "Сіняя птушка" М.Метэрлінка.

Гісторыя тэатра юнага гледача ў Мінску пачынаецца ў 1931 годзе. Тэатр працаваў да ліпеня 1941 года, быў разбураны ў час Вялікай Айчыннай вайны. Пасля вайны будынак аднавілі, часткова захаваўшы старыя сцены і фундамент. Даваеннае архітэктурнае рашэнне фасада ў асноўным было захавана.