Падзеі, факты, анонсы

Ад глінянага гаршка да вытанчаных фарфоравых форм: выстаўка посуду адкрываецца ў Магілёве

5 красавіка, Магілёў /Кар. БЕЛТА/. Выстаўка "Гісторыя посуду: эпоха і стыль" адкрыецца сёння ў музеі этнаграфіі Магілёва, паведамілі БЕЛТА ва ўстанове культуры.

На выстаўцы будзе прадстаўлена больш за чатырыста арыгінальных артэфактаў ХVII - пачатку XXI стагоддзяў, якія расказваюць гісторыю стварэння посуду, яго эвалюцыю: ад глінянага гаршка да вытанчаных фарфоравых форм.

"Посуд з'яўляецца адным з самых любімых аб'ектаў калекцыяніравання. Такія калекцыі даюць магчымасць прасачыць гісторыю культуры, змену стыляў. Яны прывабліваюць разнастайнасцю сваіх форм і фарбаў, майстэрствам, прыгажосцю і арыгінальнасцю выканання", - расказалі ў музеі.

Экспазіцыя азнаёміць наведвальнікаў з цікавымі ўзорамі ганчарнага майстэрства ХVII-XX стст., рускага і заходнееўрапейскага фарфору і фаянсу сярэдзіны XIX - пачатку ХХ стст., савецкага фарфору 1930-1990-х гг., металічнага і шклянога посуду, сталовымі прыборамі.

А для маленькіх наведвальнікаў выстаўкі будзе арганізаваны інтэрактыў: дзеці змогуць адчуць сябе мастакамі фарфоравых заводаў і ўпрыгожыць кубкі, талеркі, сподкі і збаны.

Выстаўка будзе працаваць у абласным цэнтры да 29 мая.

версія для друку

зрабіць стартавай

дабавіць у выбранае