WorldSkills Belarus 2018: фінал конкурсу сабраў больш за 300 маладых прафесіяналаў з усёй краіны

Павышэнне прэстыжу рабочых прафесій, папулярызацыя спецыяльнай адукацыі і падрыхтоўка высокакваліфікаваных кадраў для эканомікі – вось галоўныя мэты амбіцыйнага сусветнага руху WorldSkills, які ўжо аб'яднаў 79 краін свету, а з 2014 года ў іх ліку і Беларусь. І сапраўды, гэты конкурс хутка набірае папулярнасць сярод беларускіх навучальных устаноў, прадпрыемстваў, і,  вядома, саміх маладых прафесіяналаў.

Фінальны этап III Рэспубліканскага конкурсу WorldSkills Belarus сабраў у Мінску больш за 300 удзельнікаў ва ўзросце ад 22 да 24 гадоў з розных рэгіёнаў краіны. Цырымонія адкрыцця адбылася 21 мая ў комплексе "Веладром" ("Мінск-Арэна") з удзелам прадстаўнікоў міністэрстваў і ведамстваў, кіраўнікоў прадпрыемстваў, а таксама дэлегацыі з Расіі, Казахстана, Кыргызстана, Амана і Зімбабвэ.

Асноўныя "баталіі" прафконкурсу разгортваюцца на пляцоўках Футбольнага манежа і Falcon Club. Тут удзельнікі дэманструюць майстэрства па 37 кампетэнцыях у розных сферах: будаўніцтва і будаўнічыя тэхналогіі, транспарт і лагістыка, вытворчасць і інжынерныя тэхналогіі, творчасць і мода, сацыяльныя і персанальныя паслугі, інфармацыйныя і камунікацыйныя тэхналогіі… Прадстаўлены і пляцоўкі для людзей з абмежаванымі магчымасцямі па профілях "Вэб-дызайн" і "Тэхналогія моды".

Умовы прафконкурсу даволі экстрэмальныя: заданні падрыхтаваны ў адпаведнасці з замежнымі аналагамі, а на іх выкананне даецца толькі 16 гадзін (22 гадзіны – на сусветным першынстве). Пры гэтым загадзя ўмовы задач нікому не вядомы, і выкананае дачасна заданне дадатковых балаў не прыносіць. Галоўная інтрыга конкурсу вырашыцца 24 мая: у час цырымоніі закрыцця адбудзецца ўзнагароджанне пераможцаў, якія атрымаюць магчымасць 22 – 27 жніўня 2019 года прадставіць краіну на сусветным чэмпіянаце ў Казані.