Мінская дэкларацыя прынята на 26-й летняй сесіі ПА АБСЕ ў беларускай сталіцы

Парламенцкая асамблея АБСЕ 9 ліпеня на заключным пасяджэнні 26-й летняй сесіі ў беларускай сталіцы прыняла Мінскую дэкларацыю.

Асновай Мінскай дэкларацыі сталі рэзалюцыі, прынятыя па выніках дыскусій гэтай вялікай міжнароднай палітычнай пляцоўкі. У дакуменце сфармуляваны рэкамендацыі для нацыянальных урадаў, парламентаў і міжнароднай супольнасці па рэагаванні на ўзнікаючыя актуальныя выклікі і пагрозы. Парламентарыі з занепакоенасцю адзначылі існуючыя выклікі ў галіне бяспекі на ўсёй прасторы АБСЕ, уключаючы пагрозы кібербяспекі, тэрарызм, зацяжныя канфлікты і агульнае пагаршэнне атмасферы даверу, бяспекі і супрацоўніцтва.

Вострыя спрэчкі ўдзельнікаў форуму выклікала рэзалюцыя аб становішчы ва Усходняй Еўропе, якая змяшчае крытыку адносна Беларусі, Расіі, Азербайджана. У выніку па гэтай рэзалюцыі парламентарыі галасавалі асобна: не атрымаўшы большасці галасоў, у адпаведнасці з рэгламентам сесіі яна не была ўключана ў Мінскую дэкларацыю.

Кіраўнік беларускай дэлегацыі, віцэ-спікер Палаты прадстаўнікоў Баляслаў Пірштук назваў гэта пераломным момантам у адносінах Беларусі на заходняй пляцоўцы:

- Вельмі важна, што ў нас з'яўляецца ўсё больш і больш прыхільнікаў. Гэта сведчыць аб тым, што сістэмная карпатлівая работа, якую праводзіць наша дзяржава, прыкметна. Я ўдзячны нашым калегам, якія, нягледзячы на блокавы падыход, праявілі волю, характар і прынялі аб'ектыўнае рашэнне. Гэта сведчыць аб тым, што яны падзяляюць нашу пазіцыю, яны ўбачылі ў Беларусі адкрытую цывілізаваную краіну.